ԵՐԵՎԱՆ, 7 դեկտեմբերի — Sputnik, Լաուրա Սարգսյան. Վրաստանի քաղաքացի, բայց ազգությամբ հայ երիտասարդների խումբն Ախալքալաքի կենտրոնում «Մեզ հանգիստ թողեք» խորագրով բողոքի ակցիա էր կազմակերպել, Sputnik Արմենիայի թղթակցի հետ զրույցում ասաց Jnews.ge տեղեկատվական կենտրոնի խմբագիր Ռիմա Ղարիբյանը։
Ակցիայի մասնակիցների համբերությունը սպառվել է, երբ դեկտեմբերի 5-ին հերթական անգամ հարցաքննել են ակցիայի մասնակից 25-ամյա Կիմ Կուղոյանին։ Կուղոյանին, նրա ընտանիքի անդամներին ու ընկերներին արդեն չորս տարի է` հետապնդում են ոստիկանության աշխատակիցները։ Ընդ որում, ոստիկանները չեն հիմնավորում, թե ինչու են նրանք հետապնդում հենց այդ մարդկանց։
«Երիտասարդները բողոքում են, որ նրանց անընդհատ հարցաքննում են, բերման ենթարկում ոստիկանություն։ ՆԳՆ-ում մեզ ասացին, որ դա հերթական պլանային ստուգում է, և դրանում որևէ վատ բան չկա», — ասաց Ղարիբյանը։
Ակցիայի մասնակիցները Ախալքալաքի իշխանությանը կոչ են արել օգնել, որ այդ խնդիրը լուծվի. իրենց գործողություններով նրանք ցանկացել են ստեղծված իրավիճակի մասին տեղյակ պահել տեղական ինքնակառավարման մարմինների ղեկավարներին։ Կուղոյանն այսօր հոր հետ դիմել է Ախալքալաքի քաղաքապետ Յուրիկ Հունանյանին։
«Ինձ մոտ էր եկել Կուղոյանը հոր հետ։ Ես նրանց բացատրեցի, որ պետք է դիմեն բարձր ատյաններին` պարզաբանելու համար այդ անհասկանալի իրավիճակի հանգամանքները, եթե ոստիկանության աշխատակիցներն իսկապես օրենքից դուրս են գործում», — Spunik Արմենիայի թղթակցի հետ զրույցում ասաց Հունանյանը։
Նախօրեին Կուղոյանը դիմել է նաև Jnews.ge-ի խմբագրություն։ Նրա խոսքով` Ախալքալաքի ոստիկանության աշխատակիցներն իրենց մեքենայով տարել են նրան Ախալցխա, ստուգել նրա մոտ թմրանյութերի առկայությունը և ասել, որ 48 ժամվա ընթացքում լքի երկիրը։ Սակայն ՆԳՆ մամուլի ծառայությունում նշել են, որ դա սովորական ստուգում է եղել, որևէ սպառնալիք չի եղել։
Բողոքի ցույց կազմակերպած երիտասարդները հայտնել են, որ նրանցից շատերին ոստիկանությունը Ախալքալաքում կատարված ամեն հանցագործությունից հետո տանում է ստուգման և անհիմն հարցաքննություն անցկացնում:
