ԵՐԵՎԱՆ, 20 նոյեմբերի — Sputnik, Լաուրա Սարգսյան. Սամցխե-Ջավախքի հայաբնակ Դադեշ գյուղի բնակիչներին անհանգստացնում է այն փաստը, որ մինչև այսօր չեն գտել իրենց խոշոր եղջերավոր անասուններին, այն դեպքում, որ բոլոր հետքերը տանում են Թուրքիա։ Այս մասին Sputnik Արմենիային ասաց Վրաստանի խորհրդարանի պատգամավոր Սամվել Պետրոսյանը։
«Բնակիչները վախեցած են և ապրում են վրացական իշխանության արձագանքի սպասումով։ Չի բացառվում, որ Թուրքիայից եկած գողերին օգնել է տեղացիներից որևէ մեկը»,- ասաց նա։
Պետրոսյանի խոսքով, հայաբնակ գյուղերում նման դեպքեր հաճախ են գրանցվել։ Երբ նա ոստիկանության պետ է եղել, բազմաթիվ անգամ է ստիպված եղել որսալ «թուրք արկածախնդիրներին»։
Դադեշցիները վստահ են, որ իրենց խնդիրը կարելի է լուծել կարճ ժամանակահատվածում։ Նրանք արդեն հայտարարել են, որ պայքարելու են այնքան, որ վերականգնեն արդարությունը և վերադարձնեն իրենց կենդանիներին։
Դեպքը հետաքննելու համար գյուղացիներից 15 օր ժամանակ են խնդրել։ Եթե այդ ընթացքում ոչինչ չպարզվի և քայլեր չձեռնարկվի, ապա գյուղացիները պատրաստվում են բողոքի ցույց կազմակերպել և փակել Կարծախ-Ախալքալաք ճանապարհը։
Թուրքիայում արդեն հաստատել են, որ հայաբնակ գյուղի գյուղացիներից առևանգված խոշոր եղջերավոր անասուններին քշել են նրանց տարածք: Վրաստանի ուժային գերատեսչությունները և սահմանապահները շարունակում են աշխատել թուրք գործընկերների հետ՝ միջադեպի հանգամանքները պարզելու համար:
Սամցխե-Ջավախք շրջանի հայաբնակ Դադեշ գյուղի բնակիչները նոյեմբերի 6-ին բողոքի ակցիա էին կազմակերպել Կարծախից Ախալքալաք տանող ճանապարհին: Բնակիչները պահանջում էին գտնել իրենց կովերին, քանի որ շատերի համար դա եկամտի միակ աղբյուրն է: Գյուղացիների բողոքի ակցիան, սակայն, չէր խանգարել, որ Թուրքիայի եկող բեռնատարներն անցնեն այդ ճանապարհով (գյուղը սահմանակից է Թուրքիային)։ Ավելի ուշ երթևեկությունը վերականգնվել էր։
