ԵՐԵՎԱՆ, 5 դեկտեմբերի — Sputnik. Վիտալինա Ցիմբալյուկ-Ռոմանովսկայայի ներկայացուցիչ Էլինա Մազուրը հերքել է սև մոգությամբ զբաղվելու մասին լուրերը։ Նա այդ մասին խոսել է Ռոսիա 1-ի «Ուղիղ եթեր» հաղորդման շրջանակում։
Մազուրի հասցեին հնչող մեղադրանքների մասին հիշեցրել է հեռուստահաղորդավար Անդրեյ Մալախովը` նշելով, որ Մազուրին նաև էքստրասենս են համարում։
«Ես պատասխան չունեմ։ Անհեթեթություն է… Բայց չեմ թաքցնի, որ ես սարսափելի ցնցում եմ ապրել հինգ տարի, երբ մահացան լիովին առողջ ծնողներս։ Մայրս շատ ծանր հեռացավ, նրան վրաերթի էին ենթարկել շքամուտքի մոտ` տարօրինակ մի հատվածում, որտեղ նման բան չպետք է լիներ։ Մեկ տարի շարունակ պայքարում էի մորս կյանքի համար, բայց նա մահացավ», — նշել է Մազուրը։
Այնուհետև հայրը, չդիմանալով սիրելի կնոջ կորստին, դադարել է ուտել և մահացել է սրտի կաթվածից։
«Ինձ մեղադրեցին այն բանի համար, որ ծնողներս մահացել են սև մոգության պատճառով», — ասել է Վիտալինայի ներկայացուցիչը։
Հաղորդման ընթացքում քննարկվել է նաև «հասարակաց տուն պահելու» թեման։ Մազուրի խոսքով` ինքը «որևէ կապ չունի դրա հետ»։
«Մի կին, որն ինձ խոշոր գումար էր պարտք, նվիրեց իր բիզնեսի մի մասը», — ասել է Ջիգարխանյանի նախկին կնոջ ներկայացուցիչը։
Հղիություն
Հաղորդման ընթացքում Վիտալինան էլ պատմել է, որ Արմեն Բորիսովիչը երեխա է ուզել այն օրվանից, երբ մահացել է նրա դուստրը։ Նախկին կինն ասել է, որ դա ցավոտ թեմա էր դերասանի համար։
«Արմեն Բորիսովիչի նախորդ կինը չի ցանկացել այլևս երեխա ունենալ։ Մենք նման խոսակցություն ունեցել ենք, ես նրան չեմ մերժել։ Բայց ես կարծում եմ, որ դրան որոշակի ժամանակ էր պետք հատկացնել։ Ես իսկապես դեմ չէի, ինձ թվում է` ցանկացած կին ուզում է երեխա ունենալ սիրելի մարդուց», — պատմել է Վիտալինան։
Ջիգարխանյանի նախկին կինը հերքել է հղիության մասին լուրը։
«Ես իսկապես հղի չեմ։ Եթե իհարկե չեն հղիանում մամուլում տարածված լուրերից, ապա ես իսկապես հղի չեմ», — ասել է Վիտալինան։82-ամյա դերասան Արմեն Ջիգարխանյանի և նրա 38-ամյա կնոջ` Վիտալինա Ցիմբալյուկ-Ռոմանովսկայայի մասին սկսեցին խոսել հոկտեմբերի առաջին տասնօրյակում, երբ դերասանը հայտնվեց հիվանդանոցում և հայտարարեց, որ պատրաստ չէ ներել իրեն ցավ պատճառած կնոջը։
Ավելի վաղ Ցիմբալյուկ-Ռոմանովսկայան, որ Ջիգարխանյանի ղեկավարած թատրոնում տնօրենի պաշտոն էր զբաղեցնում, սեփական ցանկությամբ հեռացել էր թատրոնից և հայտարարել, որ ցանկանում է ամուսնալուծվել։
Դրանից հետո Ջիգարխանյանը պաշտոնական նամակ էր ուղղել Մոսկվայի մշակույթի դեպարտամենտ` իրեն և թատրոնի արտիստներին «կոլեկտիվի նորմալ աշխատանքին խանգարող խաբեբաներից» պաշտպանելու խնդրանքով։
Հոկտեմբերի վերջին Արմեն Ջիգարխանյանի ղեկավարած թատրոնում հետաքննչական գործողություններ անցկացվեցին դերասանի կորցրած անձնագրի վերաբերյալ քրեական գործով։ Տեղեկացվեց նաև, որ խուզարկություն է անցկացվել Ցիմբալյուկ-Ռոմանովսկայայի բնակարանում, առգրավվել են արտասահմանյան անձնագիրը, բժշկական փաստաթղթերն ու Ջիգարխանյանի կտակը։
