ԵՐԵՎԱՆ, 5 դեկտեմբերի — Sputnik. Ռուսաստանը, Հայաստանը, Ղրղըզստանը և Իրանը ստեղծում են Օմբուդսմենների եվրասիական դաշինք, համապատասխան հուշագիրը ստորագրվել է այսօր Մոսկվայում միջազգային գիտագործնական համաժողովում, հաղորդում է ՌԴ Դաշնության խորհրդի հեռուստաալիքը։
Հիմնադիրների մտահաղացմամբ` նոր դաշինքը կարող է օգնել ամրապնդել օմբուդսմենների ինստիտուտը և աջակցել նրանց ավելի արդյունավետ պաշտպանել իրենց քաղաքացիների իրավունքները եվրասիական տարածությունում։ Մասնավորապես, իրավապաշտպանների միավորումը կզբաղվի ներգաղթյալների, որդեգրված երեխաների, արտասահմանյան ուսանողների խնդիրների լուծմամբ։
Անդրադառնալով բարձրացրած խնդիրներին` Ռուսաստանում մարդու իրավունքների լիազոր Տատյանա Մոսկալկովան, ելույթ ունենալով «Մարդու իրավունքների պաշտպանության խնդիրները եվրասիական տարածությունում. օմբուդսմենների լավագույն փորձերի փոխանակումը» միջոցառմանը, նշել է մասնավոր բժշկության և մասնավոր կրթության ոլորտներում մարդու իրավունքների խախտումների նկատմամբ անբավարար արձագանքը։
«Ինձ շատ է դուր գալիս Հայաստանում մարդու իրավունքների լիազոր անձի ինստիտուտի փորձը, որտեղ նա ոչ միայն արձագանքում է իշխանության մարմինների կողմից խախտումներին, այլ նաև գործարարների, մասնավոր ձեռքերում գտնվող մարմինների, ինչը մեզ այսօր շատ պետք է բժշկության ոլորտում», – նշեց Մոսկալկովան։
Համաժողովին մասնակցող օմբուդսմենները նույնպես պայմանավորվել են ստեղծել «Եվրասիական օմբուդսմեն» ինտերնետային պորտալը։ Այս կայքում կտեղադրվի տեղեկատվություն քաղաքացիների համար, որոնք օգնության կարիք ունեն, ինչպես նաև տեղեկություններ նոր պրոֆեսիոնալ դաշինքի անդամ երկրներում մարդու իրավունքներով լիազորների լավագույն փորձի մասին։
