ԵՐԵՎԱՆ, 5 դեկտեմբերի — Sputnik. Հայաստանը լիովին համաձայն է Արցախի վերաբերյալ ՀԱՊԿ անդամ երկրների վերջին հայտարարության հետ։ Այդ մասին խորհրդարանում հայտարարել է ԱԺ փոխխոսնակ Էդուարդ Շարմազանովը։ Նա հիշեցրել է, որ նոյեմբերի 30–ին Մինսկում ՀԱՊԿ գագաթնաժողովի ընթացքում արված հայտարարության մեջ ասվում է, որ աջակցում են ԵԱՀԿ Մինսկի խմբի միջնորդական աշխատանքին, կոչ են անում կատարել Վիեննայում և Սանկտ Պետերբուգում ձեռք բերված համաձայնությունները` ուղղված հակամարտող կողմերի միջև վստահության ամրապնդմանը։
«Այդ մոտեցումը լիովին համահունչ է հայկական կողմի դիրքորոշմանը։ Ուստի, այն կարելի է անվանել նախագահ Սերժ Սարգսյանի դիվանագիտական հաղթանակը։ Արցախում վերջերս կայացած զորավարժություններն ապացուցեցին, որ դիվանագիտական հաջողություններն ամրապնդվում են մարտունակ բանակով», – հավելեց Շարմազանովը։
Ավլի վաղ ԵԱՀԿ Մինսկի խումբը հայտարարություն էր տարածել, որում ասվում էր, որ սա միջազգային հանրության կողմից մանդատով միակ կառույցն է, որի առաքելությունը ղարաբաղյան հակամարտության կողմերին աջակցելն է` այն քաղաքական–դիվանագիտական միջոցներով կարգավորելու համար։
