ԵՐԵՎԱՆ, 5 դեկտեմբերի — Sputnik. Գյումրիում 23-ամյա երիտասարդը «գլխի բաց ծակած վնասվածք, գանգի ոսկորների կոտրվածք» ախտորոշմամբ դեկտեմբերի 1-ին տեղափոխվել է հիվանդանոց։Այս մասին տեղեկացնում է ՀՀ քննչական կոմիտեի մամուլի ծառայությունը։
Դեպքի առթիվ Քննչական կոմիտեի Շիրակի մարզային վարչությունում հարուցվել է քրեական գործ։
Նախաքննության ընթացքում քննիչները պարզել են, որ երիտասարդը վնասվածքները ստացել է Գյումրիի դիսկո ակումբում տեղի ունեցած վիճաբանության ժամանակ։ Նախնական քննության տվյալներով՝ մի խումբ երիտասարդներ վիճաբանել են։
Վիճաբանության մասնակիցներից մեկը գարեջրի դատարկ շշով հարվածել է երիտասարդի գլխին։ Հանցագործության ենթադրյալ կատարողը, քննչական մարմնի կարծիքով, 21–ամյա գյումրեցի երիտասարդ է։ Նրա նկատմամբ որպես խափանման միջոց է ընտրվել կալանավորումը:
Նախաքննությունը շարունակվում է, միջոցներ են ձեռնարկվում՝ միջադեպին մասնակից անձանց շրջանակը պարզելու, նրանցից յուրաքանչյուրի արարքը պարզելու ուղղությամբ։
