ԵՐԵՎԱՆ, 5 դեկտեմբերի — Sputnik. Արծվաշեն գյուղի փախստականներն այսօր բողոքի ցույց են անցկացրել նախագահական նստավայրի մոտ։ 120 կմ հեռավորությունից Երևան եկած շուրջ 40 մարդ տարիներով խնդրում են վերանորոգել իրենց վնասված պատերը և տանիքները։
Խորհրդային շրջանում Արծվաշենը Հայկական ԽՍՀ «կղզյակն» էր Ադրբեջանական ԽՍՀ–ում։ Երբ 1992թ–ի օգոստոսին այն գրավել են, գյուղացիները փախել են սահմանից այս կողմ և հաստատվել մոլոկանների Կրասնոսելսկ գյուղում։
Այդ ամիսներին մոլոկանները լքել են գյուղը և դիմել Ռուսաստանի դեսպանատուն` խնդրելով վերաբնակեցնել իրենց։ Այդ ժամանակ նրանց հող են առաջարկել Կրասնոդարի երկրամասում, գրեթե բոլորը հեռացել են։ Նրանց լքված գերանաշեն տներում էլ բնակեցրել են փախստականներին։ Փորագրված շրջանականեր, գերաններ… Արտաքուստ այդ ամենը գեղեցիկ է, բայց ներսում շատ ցուրտ է, որովհետև հին փայտն արդեն ճաքել է, իսկ ձմռանն այս տարածքում անտանելի ցուրտ է։
Sputnik Արմենիայի թղթակցի հետ զրույցում Գեղարքունիքի մարզի պատգամավոր Ռաֆիկ Գրիգորյանը նշեց, որ տարածքային կառավարման և զարգացման նախարարի առաջին տեղակալ Վաչե Տերտերյանի մոտ բարձրացրել է հարցը։
«Բայց առաջիկայում չի ստացվի նրանց հարցը ներառել բյուջեում», – ասում է նա։
Բնակիչներն ում հետ ասես չեն հանդիպել` Գրիգորյանի, Գեղարքունիքի մարզպետ Կարեն Բոթոյանի հետ, նամակներ են հանձնել տարածքային կառավարման նախարար Դավիթ Լոքյանին։ Պատասխան չկա։
