ԵՐԵՎԱՆ, 5 դեկտեմբերի — Sputnik. Հայաստանում վաճառվող առաջին սպառման ապրանքներն օր օրի թանկանում են, իսկ պատկան մարմինները փորձում են գիտահետազոտական վերլուծություններ անել թանկացման պատճառների վերաբերյալ, գրում է «Հայկական ժամանակ» օրաթերթը։
Թերթը հերթական դիտարկումն է իրականացրել Երևանի փոքր կենտրոնում։
«Վերջին անգամ ծավալուն դիտարկում իրականացրել էինք նոյեմբերի 7-ին և մեր համեմատությունը ներկայացնում ենք այդ օրվա և այսօրվա գների համադրմամբ»,- նշված է հոդվածում:
Ըստ ՀԺ-ի` կարագի 1 կիլոգրամի գինը շարունակվում է տատանվել: Եթե «Անքոր» տեսակի կարագի 1 կիլոգրամը նախորդ ամիս արձանագրել էինք 4450 դրամ, ապա այսօր այն դարձել է 4510 դրամ: Կարագի այդ տեսակը թանկացել է 60 դրամով: Նույնը չենք կարող ասել «Նորզելանդական» տեսակի կարագի մասին, քանի որ նախորդ ամսվա 4490 դրամ գինն այսօր դարձել է 4430 դրամ: «Նորզելանդական» տեսակի կարագն էժանացել է 60 դրամով:
«Թանկացել է նաև թթվասերը: Եթե նախորդ ամիս «Աշտարակ կաթ» և «Մարիաննա» տեսակի 400 գրամ ծավալով թթվասերը վաճառվում էր 470-ից 500 դրամով, ապա այսօր երկու տեսակն էլ 500 դրամով էր վաճառքի դրված:
Հնդկական ընկույզը մոտենում է իր գնի գագաթնակետին: «Երևան սիթի» սուպերմարկետում ընկույզի այդ տեսակի գինը հասել է մեկ կիլոգրամը 12 հազար դրամ սահմանագծին, մինչդեռ փոքր մթերային խանութներում նույն տեսակի ընկույզ կարելի է հանդիպել 7900 դրամով: Սովորական ընկույզի գինն էլ հասել է 8 հազար դրամի: Ընկույզի միջուկ լավագույն դեպքում կարելի է գնել 6500 դրամից սկսած, իսկ հատընտիր ընկույզը՝ 8000 դրամից ոչ պակաս:
Մսամթերքի գինը հետ չի մնում մյուս ապրանքատեսակներից: Մեկ կիլոգրամ տավարի ֆիլեն դարձել է 3550 դրամ, մինչդեռ մեկ ամիս առաջ այն կարելի էր գնել 3350 դրամով: Լանգետի համար նախատեսված ֆիլեն այսօր վաճառվում էր 4260 դրամով: Խոզի չալաղաջը էժանացել է: Նախկին 3700 դրամի փոխարեն խոզի մսի այդ տեսակն այսօր վաճառվում էր 3200 դրամով:
Մրգի և բանջարեղենի գների էական տարբերություն չկա: Թանկացել է համեմ տեսակի կանաչին: Եթե նախորդ ամիս այն վաճառվում էր 90 դրամով, ապա այսօր դարձել է 130 դրամ: Թանկացել է նաև բանանը: Նախորդ ամիս 630 դրամով վաճառվող բանան այսօր դարձել է 665 դրամ: Լոլիկն ու վարունգը նույնպես թանկացել են: Լոլիկի դեպքում թանկացումը 50 դրամ է, իսկ վարունգի պարագայում՝ հսկայական: Վարունգն այսօր վաճառվում էր 720/1կգ գնով, իսկ լոլիկը՝ 750դրամ/1կգ: Նշենք, որ լոլիկն ու վարունգը նախորդ ամիս հետևյալ գներն ունեին. առաջինի դեպքում 700 դրամ, իսկ երկրորդի դեպքում՝ սկսած 370 դրամից:
Էժանացել է ձուն: 1 հատ ձուն կարելի է գնել 62 դրամով, մինչդեռ նախորդ շաբաթ ձուն հասել էր 90 դրամի սահմանագծին»,- գրում է թերթը:
