ԵՐԵՎԱՆ, 4 դեկտեմբերի — Sputnik. Թուրքիայում կազմակերպված հանցավորությունը վերածնվում է, դրա հնարավոր կապերը երկրի նախագահ Ռեջեփ Թայիփ Էրդողանի հետ ստիպում են նրան «հարձակվել» ԱՄՆ–ի վրա, որպեսզի հեռացնի իրենից կասկածները, գրում է ամերիկյան Foreign Affairs ամսագիրը։
«Թուրքիան վերածվում է մաֆիական պետության» վերնագրով հոդվածում հեղինակները դիտարկում են Ֆլորիդայում ձերբակալված թուրք–իրանական գործարար Ռեզա Զարաբի գործը, որին մեղադրել են հակաիրանական պատժամիջոցները շրջանցելով «ոսկի` նավթի փոխարեն» սխեմայի ստեղծման մեջ։
Հրատարակությունը հնարավոր է համարում, որ այդ սխեման աշխատել է ազգականների և Թուրքիայի կառավարությունում նախարար ընկերների աջակցությամբ։ «Հետաքննություն սկսելուց հետո մեղադրանքները հանվել են, իսկ չորեքշաբթի Զարաբը զբաղեցրել է վկայի տեղը` հայտարարելով, որ նա կաշառել է էկոնոմիկայի նախարարին», – գրում է ամսագիրը։
Տեքստում նշվում է, որ գործը կարող էր ազդել Էրդողանի վրա, ուստի նա կշտամբել է ԱՄՆ–ին` քննադատելով դավադրություն կազմակերպելու մեջ. իբր դա արվում է Թուրքիայում իշխանափոխություն անելու նպատակով, որում ներքաշված է «Հիզմեթ» շարժման առաջնորդ Ֆեթուլլահ Գյուլենը։ Էրդողանը հենց նրան է մեղադրել 2016թ–ին հեղաշրջում կատարելու փորձի մեջ։
2009թ–ին երկրի գլխավոր հակաթմրանյութային մարմինը` Մաքսանենգության դեմ պայքարի բաժանմունքը, արձանագրել է նավթի անօրինական առևտրի հետ կապված 800 դեպք, սակայն մինչև 2014թ–ը նման գործողությունների ընդհանուր թիվը կազմել է շուրջ 5000։
Ավելի վաղ Քեմալ Քիլիչդարօղլուն` թուրքական ընդդիմադիր Ժողովրդահանրապետական կուսակցության առաջնորդը, հրապարակել է փաստաթղթեր, որոնք վկայում են միլիոնավոր գումարների մասին` փոխանցված թուրք նախագահ Էրդողանի և նրա ընտանիքի անդամների անունից օֆշորներին։
Իր վերջին ելույթում Էրդողանը հայտարարել է, որ Վաշինգտոնը փորձում է խտրականություն դնել և պատժել Անկարային` իր սցենարին չենթարկվելու համար։ Նրա խոսքով` ԱՄՆ–ն անում է դա FETÖ–ի (ընդդիմադիր քարոզիչ Ֆեթուլլահ Գյուլենի կազմակերպությունը) հետ։
Էրդողանը նաև մեղադրել է Վաշինգտոնին Թուրքիայում արգելված Քրդստանի աշխատավորական կուսակցությանն աջակցելու մեջ։ Նրա խոսքով` այդ սցենարի մի մաս են կազմում ԱՄՆ–ում Թուրքիայի քաղաքացիների դեմ դատավարությունները։
