ԵՐԵՎԱՆ, 4 դեկտեմբերի — Sputnik. Ադրբեջանի նախագահ Իլհամ Ալիևը և Եվրամիության` Հարավային Կովկասի հարցերով ներկայացուցիչ Թոյվո Կլաարը քննարկել են ղարաբաղյան հակամարտության կարգավորման բանակցային գործընթացը, հաղորդում են ադրբեջանական ԶԼՄ-ները։
Հանդիպմանը կայացել է կարծիքների փոխանակում ղարաբաղյան հակամարտության ներկա իրադրության վերաբերյալ։
Կլաարն առաջին անգամ է ժամանել Բաքու, սակայն նշել է, որ զարգացման գործընթացները, որոնց ականատես է նա դարձել, նրա վրա խորը տպավորություն են գործել։
Էստոնացի դիվանագետ Թոյվո Կլաարը Եվրամիության` Հարավային Կովկասի և Վրաստանում ճգնաժամի հարցերով նոր հատուկ ներկայացուցիչ է դարձել գերմանացի Հերբերտ Զալբերից հետո, որն այս տարվա ամռանը հրաժարական է տվել։
Մինչև հատուկ ներկայացուցիչ նշանակվելը Կլաարը գլխավորել է Եվրոպական արտաքին քաղաքական ծառայության` Կենտրոնական Ասիայի հարցերով ստորաբաժանումը, իսկ մինչ այդ` Վրաստանում Եվրամիության մոնիտորինգային առաքելությունը։
Եվրամիության հատուկ ներկայացուցչի հիմնական խնդիրը տարածաշրջանում հակամարտության խաղաղ կարգավորմանն աջակցելն է, ինչպես նաև տարածաշրջանային փոխգործակցությունը խթանելը։
