ԵՐԵՎԱՆ, 2 դեկտեմբերի – Sputnik. ՀԱՊԿ-ը գիտակցում է, որ ղարաբաղյան հակամարտությունում միջնորդությունը պատկանում է ԵԱՀԿ Մինսկի խմբին, Sputnik Արմենիային ասաց քաղաքագետ Երվանդ Բոզոյանը։
ԵԱՀԿ Մինսկի խումբը միակ կառույցն է՝ միջազգային հանրության կողմից մանդատով, որի առաքելությունը ղարաբաղյան հակամարտության կողմերին աջակցություն ցուցաբերելն է՝ քաղաքական-դիվանագիտական միջոցներով կարգավորելու համար։ Այդ մասին ասվում է ՀԱՊԿ անդամ երկրների համատեղ հայտարարությունում նոյեմբերի 30-ին։
«Դա կշռադատված հայտարարություն էր, ՀԱՊԿ-ն ընդունում է, որ միջնորդական առաքելությունը պատկանում է միայն ԵԱՀԿ Մինսկի խմբին։ Նման հավասարակշռված դիրքորոշումը կարելի է միայն ողջունել», — ասաց Բոզոյանը։
Մինսկի խումբը պետք է ակտիվություն ցուցաբերի, բայց այստեղ հարցը ՄԽ մեջ չէ։ Նրա խոսքով՝ պետք է դիտարկել, թե կողմերը որքանով են պատրաստ զիջումների։
Ադրբեջանը փոխզիջում ասելով հասկանում է միայն զիջումներ Հայաստանի կողմից, բայց այդ դիրքորոշումն ապակառուցողական ազդեցություն է ունենում բանակցությունների վրա։
«Ուստի մոտ ապագայում հարցի լուծման հեռանկարներ չկան։ Դա բոլորն են հասկանում և ըմբռնումով են մոտենում Հայաստանի դիրքորոշմանը», — ասաց Բոզոյանը։
Նրա խոսքով՝ Ադրբեջանն անընդհատ հայտարարում է, որ ստատուս քվոն պետք է փոխվի, բայց այն չի փոխվում հենց նրա մոտեցման պատճառով։
Հայտարարությունում աջակցություն են հայտնում ԵԱՀԿ ՄԽ համանախագահ երկրներին (Ռուսաստան, ԱՄՆ, Ֆրանսիա), որոնց շնորհիվ մշակվել է տարրերի և սկզբունքների ամբողջականություն՝ որպես հիմքեր ղարաբաղյան հակամարտության լուծման համար։
Հավաքական անվտանգության պայմանագրի կազմակերպությունը (ՀԱՊԿ) ստեղծվել է 2002թ.-ին, այժմ կազմակերպության կազմում վեց պետություն է ընդգրկված`Հայաստանը, Բելառուսը, Ղազախստանը, Ղրղզստանը, Ռուսաստանը և Տաջիկստանը։ ՀՀ-ն ՀԱՊԿ-ի պայմանագիրը ստորագրել է 1992 թվականի մայիսի 15-ին։ Հայաստանը ՀԱՊԿ-ում նախագահում է 2015 թվականի սեպտեմբերից:
