Լիլիթ Հարությունյան, Sputnik
Sputnik Արմենիան ներկայացնում է անցնող տարվա ընթացքում աչքի ընկած հայ դիզայներների հնգյակը, որոնց հաջողվել է համաշխարհային հասարակության ուշադրությունը հրավիրել «Made in Armenia» ապրանքանիշին։
Հայաստանցի դիզայներների կյանքը հեշտ չէ, քանի որ թեթև արդյունաբերությունը երկրում գրեթե լիովին բացակայում է։ Լավ է՝ տեղացի նկարիչ-ձևավորողները մուսայի ու երևակայության պակաս չունեն։ Հենց դա է թույլ տալիս նրանց նոր հորիզոններ նվաճել, այլ շուկաներ դուրս գալ ու, ինչու ոչ, իրենց ստեղծագործություններով զարմացնել աշխարհին…
Լիանա Սարգսյան
Elsi ապրանքանիշը ներկայացնող դիզայներ Լիանա Սարգսյանի համար այս տարին իսկապես շլացուցիչ էր։
YerevanFashionWeek «Golden Lace»-ում Haute Couture հավաքածուն ցուցադրելուց հետո նա դրամաշնորհ ստացավ հեղինակավոր Follow The Fabrika նախագծին մասնակցելու համար։ Հենց այնտեղ էլ նրան նկատեց Իտալիայից ժամանած ֆեյշն- հյուպատոսը։ Միլանի նորաձևության շաբաթի նախագահ Մարիո Բոզելին Լիանայի անունը ներառեց Վենետիկի 74-րդ կինոփառատոնի շրջանակում կայացած Palazzo Contarini Polignac փակ ցուցադրությանը ներկայացված դիզայներների լավագույն յոթնյակում։
Հայ մոդելավորողը կարողացավ աչքի ընկնել նույնիսկ այդպիսի հեղինակավոր միջոցառման ընթացքում։ Հենց Լիանան արժանացավ հեղինակավոր Մարիո Բոզելիի ուշադրությանը, որը գնահատեց նրա «պրեմիում դասի» աշխատանքները։ Բացի այդ, միջոցառմանը ներկայացրած զգեստներից միայն նրա աշխատանքներն աստղերն ընտրեցին Վենետիկի կինոփառատոնի կարմիր գորգի համար։ Հայ դիզայների զգեստներով շրջում էին հայտնի դերասանուհի Թիֆնի Բրոուվերը, հաղորդավարուհի, նորաձևության ոլորտի փորձագետ, արքայադուստր Ելնա-Մարգրետ Բենթհայմն ու միջոցառման բրենդ-մենեջեր Անգելա Սայմոնը։
Լիանայի հաջողություններն այսքանով չսահմանափակվեցին։ Նոյեմբերին նա հավաքածու է ներկայացրեց Դուբայում անցկացված Նորաձևության շաբաթվա՝ FashionForward-ի ընթացքում։ Նշենք, որ այս միջոցառումը նորաձևության աշխարհի ամենակարևոր իրադարձություններից է, ինչպես Փարիզում, Լոնդոնում, Նյու Յորքում ու Միլանում անցկացվող Նորաձևության շաբաթները։
Լիլիթ Մելիքյան
«Տերյան» մշակութային կենտրոնի ղեկավար, արվեստագիտության թեկնածու, նկարիչ-դիզայներ Լիլիթ Մելիքյանը նորաձևության մեջ վերածնում է ազգայինը։ Մասնավորապես, նա զբաղվում է տարազի արդիականացմամբ։ Նրա ստեղծած ապրանքանիշը կոչվում է Taraz&Art։
Նշենք, որ հենց «Տերյան» մշակութային կենտրոնն էր Կարսի ազգային տարազի հեղինակը, որ պատրաստվել էր Քիմ Քարդաշյանի համար նրա հայաստանյան այցելության ժամանակ։ Կենտրոնը նաև հայկական ազգային նախշազարդերով հագուստ էր պատրաստել Հռոմի Ֆրանցիսկոս պապի համար։ Հենց այդ հագուստով է նա ժամերգություն անցկացրել Գյումրիում։
Սեպտեմբերին Լիլիթն իր հավաքածուի լավագույն նմուշերն է ցուցադրել Պեկինում անցկացված «Հայկական մշակույթի օրերի» շրջանակում։ Հետաքրքիր է, որ քսան զգեստները ցուցադրել են չինացի մոդելները։ Բացի այդ, նույն հավաքածուի մի մասը վերջին երկու ամսվա ընթացքում ցուցադրվել է Շվեդիայում, Հորդանանում, Գերմանիայում ու ԱՄՆ-ում։
Իսկ այս տարվա մարտին դիզայները հայկական արքայական հագուստի աննախադեպ հավաքածու ցուցադրեց, որ կոչվում էր «Արքայից արքա»։ Ցուցադրությունը կայացավ «Մեգերյան կարպետ» թանգարանում, որտեղ մոդելները հյուրերին ներկայացրին Երվանդունիների, Արտաշեսյանների, Բագրատունիների, Արշակունիների ու նաև կիլիկյան արքաների հագուստները։ Նորաձև շոուն բացեցին Վանա թագավորության գլխավոր աստված Խալդն ու պտղաբերության աստվածուհի Բագբարտուին։
Վահան Խաչատրյան
Վահան Խաչատրյանը միակ հայ դիզայներն է, որի անունը 2016-ին ներառվել է Vogue-ի կազմած հեղինակավոր ցուցակում։
Մոդելավորողը երկու հավաքածու էր ներկայացրել՝ Vahan Khachatryan և Biayni by Vahan Khachatryan։ Հենց երկրորդ ապրանքանիշն է դիզայներն ակտիվորեն զարգացրել այս տարվա ընթացքում ու լավ արդյունքի է հասել։
Biyani-ի հագուստի նմուշները ներկայացվել են ինչպես Հայաստանում, այնպես էլ արտասահմանում։ Այսպես՝ Spice Girls կոչվող հավաքածուն, որը ստեղծելիս դիզայները ոգեշնչվել է 90-ականներին հայտնի խմբի մասնակիցների արվեստով, սեպտեմբերին ներկայացվել է հեղինակավոր Pitti Super ցուցահանդեսին, որը անցնում է Միլանում Նորաձևության շաբաթվա ընթացքում։ Բացի այդ, հունիսին ներկայացվել է նաև Թուրինի նորաձևության շաբաթվա ընթացքում։ Հետաքրքրական է, որ համացանցում Spice Girls հավաքածուն տեսնելիս՝ Վահանի աշխատանքներով հետաքրքրվել է Spice Girls խմբի մասնակից Մելանի Բրաունը։
Գարնանը Biayni —ի ցուցադրություն կայացավ նաև Երևանում՝ Dalma Garden Mall առևտրի կենտրոնում։ Դրանից հետո դիզայները մասնակցեց Mercedes Benz Kiev Fashion Days միջոցառմանը։ Կազմակերպիչները, վստահելով Վահանի ճաշակին, նրան հնարավորություն էին տվել ընտրելու ևս տասը հայ նկարիչ-մոդելավորողի՝ նորաձև շոուին մասնակցելու համար։
Արիգա Թորոսյան
Երիտասարդ դիզայներ Արիգա Թորոսյանը, որ ներկայացնում է իր սեփական Arigato ապրանքանիշը, այս տարի Փարիզում Նորաձևության շաբաթվա միակ հայ մասնակիցն էր։ Աշխարհահռչակ ապրանքանիշների տաղավարների կողքին գործում էր նաև նրա «շոուռումը»։
Elemental Impression կոչվող հավաքածուի ստեղծման համար ոգեշնչման աղբյուր են հանդիսացել երկրաչափական պատկերները՝ եռանկյունին, ուղղանկյունն ու շրջանը։
Պետք է նշել, որ Փարիզի Նորաձևության շաբաթը եզրափակում է համաշխարհային 4 Շաբաթը, որոնք անցկացվում են 1973 թվականից։ Նորաձևության ոլորտի ամենակարևոր իրադարձությունն անցկացվում է տարին երկու անգամ՝ մարտի սկզբին ու սեպտեմբեր-հոկտեմբեր ամիսներին։ Հենց այնտեղ են անցկացվում աշխարհահռչակ Chanel-ի, Christian Dior-ի, Louis Vuitton-ի, Balmain-ի, Chloé-ի, Nina Ricci-ի, Lanvin-ի, Balenciaga-ի և նորաձևության մյուս տների ցուցադրությունները։
Միկա Դանիելյան
Միկա Դանիելյանը, որ երկար տարիներ հանդես է գալիս Harmony ապրանքանիշով, տարիներ շարունակ ստեղծագործում էր միայն luxury սեգմենտում։ Սակայն այս տարի դիզայները ստեղծեց նոր, ավելի երիտասարդական հավաքածու, որ կոչվում է Young Harmony։ Դիզայներին արդեն հաջողվել է նոր ապրանքանիշը ներկայացնել ոչ միայն Երևանում, այլև Մոսկվայում ու Լոս Անջելեսում։
