ԵՐԵՎԱՆ, 3 դեկտեմբերի — Sputnik. Ալբերտ Բեգրակյանը սկսել է վիճակախաղերի մասնակցել 1986 թվականից, բայց բախտը բերել է միայն 2009-ին։ Նա 100–միլիոնանոց շահում է ստացել՝ տան մոտ գտնվող կրպակից գնելով հերթական վիճակահանության տոմսը։ Այս մասին գրում է «Կոմսոմոլսկայա պրավդա» պարբերականը։
Արդեն երկու տարի անց այդ աստղաբաշխական գումարից ոչինչ չի մնացել։ Շահած գումարներն «անհետացել են», Ալբերտը խրվել է պարտքերի մեջ, ու նրա նկատմամբ քրեական գործ է հարուցվել։
Նա Հայաստանից Ռուսաստան է տեղափոխվել 2001 թվականին, Սանկտ Պետերբուրգի մոտակա Կիլպինո քաղաքում բնակարան է վարձել ու խանութ բացել։
«Սկզբում նույնիսկ ճաղերի գումար չունեի։ Մեկուկես ամիս աշխատավայրում էի գիշերում, որպեսզի ապրանքը չգողանան։ Մի երկու անգամ թմրամոլների հետ եմ կռվել», — պատմել է Բեգրակյանը։
Հետո հաջողությունը ժպտացել է․ գործը սկսել է ծաղկել, մեքենա է գնել, կարողացել է ավտոսերվիս բացել, շինարարությամբ զբաղվել։ Բայց հետո նորից է սնանկացել։
Վիճակախաղերի սիրահար Ալբերտ Բեգրակյանը «Գոսլոտոյի» հաջողակ տոմս է գնել, որում համընկել են 45 թվից վեցը, ու նա մեկ վայրկյանում միլիոնատեր է դարձել` շահելով հարյուր միլիոն ռուբլի, ինչն այն ժամանակ երեք միլիոն դոլար էր կազմում։
Նորաթուխ միլիոնատերն ավտոմեքենա է գնել Հայաստանում ապրող հոր համար, բաժանել է 12 միլիոն ռուբլի կազմող պարտքերը և հեռացել վարձակալած բնակարանից։
«Միանգամից նոր ընկերներ ձեռք բերեցի։ Հեռախոսս անդադար զնգում էր։ Ինձ դիմում էին նույնիսկ այնպիսի մարդիկ, որոնց քսան տարի չէի տեսել։ Ու ես պարտքով գումար էի տալիս։ Ոչ բոլորին, բայց շատերին։ Ստացական չէի վերցնում», — պատմել է Ալբերտը։
Նա այդ փողով իր համար վերջին մոդելի «Լեքսուս» է գնել, քրոջ համար` բնակարան Հայաստանում։ Սանկտ Պետերբուրգում մեծ բնակարան է գնել ու 16 միլիոն դոլարով նորոգել այն։
Հայկական շռայլ հոգին չի կարողացել գումարն իր մոտ պահել։ Ալբերտը նաև գումար է տվել Կոլպինոյի ծերանոցին ու նվիատվություն կատարել այն դպրոցի համար, որտեղ սովորել են դուստրերը։ Բացի այդ, հող է գնել Թամանում՝ հյուրանոց կառուցելու նպատակով ու ևս մի քանի բնակարան Հյուսիսային մայրաքաղաքում։ Եվ գումարը սպառվել է։
Տարվա ընթացքում Ալբերտը պետք է 13 միլիոն ռուբլի հարկ վճարեր։ Նա մի կողմ էր դրել այդ գումարը։ Բայց այդ ժամանակ համաշխարհային տնտեսական ճգնաժամ սկսվեց։ Հյուրանոցի կառուցման համար գումարը չհերիքեց, Բեգրակյանը մի կողմ դրած գումարի 8,5 միլիոնը տվեց պետությանը, իսկ 4,5-ն ուղղեց հյուրանոցի կառուցման գործին։
«Մտածում էի` պարտատերերս կվերադարձնեն այդ չորսուկես միլիոնը, բայց չվերադարձրին։ Ու ես ինքս պարտապան դարձա։ Իմ նկատմամբ քրեական գործ հարուցեցին, ունեցվածքիս վրա էլ կալանք դրեցին», — ասել է Բեգրակյանը։
Բախտը բերել է, որ Պետերբուրգի բնակարաններից մեկը, որ չէր հասցրել սեփականություն ձևակերպել, կարողացել է վաճառել։ Գումարը հերիքել է հարկի մնացած մասը վճարելու համար։ Գործը փակել են։
Գրեթե տասը տարի է անցել, և այսօր Բեգրակյանը փիլիսոփայորեն է մոտենում իր հաղթանակին։ Վիճակախաղում հաղթանակն «իր ընտանիքի համար փորձություն» է անվանում։ Նա համոզված է, որ գումարն արագ է ծախսել, բայց խելամտորեն։
Գործարար Ալբերտ Բեգրակյանը ռեկորդային 506 միլիոն հաղթած վորոնեժցի թոշակառուին խորհուրդ է տալիս փոխել հեռախոսահամարն ու հնարավորինս շուտ հեռանալ քաղաքից։
