ԵՐԵՎԱՆ, 2 դեկտեմբերի – Sputnik. Բալկանյան ԶԼՄ-ներն արձագանքել են խորվաթ գեներալ Սլոբոդան Պրալյակի ինքնասպանությանը, որը դատարանի դահլիճում սրվակով թույն է խմել։ Գեներալի ինքնասպանությունից հետո նրա կինը և երեխաները հրապարակել են Պրալյակի թողած գրությունը, որը նա խնդրել է բացել միայն իր մահից հետո։ Գեներալի վերջին կամքն է եղել դիակիզել իրեն, իսկ փոշին թաղել Զագրեբի Միրոգոյ պանթեոնում։
«Պետք չէ ոչ դագաղ, ոչ հուղարկավորություն։ Իմ մոխիրը սփռեք Միրոգոյում», — գրել է նա։
Գեներալ Պրալյակին դատապարտել են հիմնականում բոսնիացիներով բնակեցված Մոսթար քաղաքում իր հրամանատարության տակ գտնվող զինվորների կողմից քաղաքի բնակիչներից շատերին սպանելու, բանտարկելու իսկ կանանց նաև ծեծի ենթարկելու մեղադրանքով:
Ընդհանուր առմամբ, նախկին Հարավսլավիայի գործող դատարանը դատապարտել է 90 մարդու՝ տարբեր կողմերից էթնիկ զտումներ և պատերազմի հանցագործություններ իրականացնելու համար: Գեներալ Սլոբոդան Պրալյակի հետ դատապարտվել է ևս հինգ պատերազմի հանցագործ՝ 10-25 տարվա ազատազրկման: Այսպիսով, նախկին Հարավսլավիայի պատերազմի էջը փակված է, եթե ոչ պատմական, ապա գոնե՝ իրավական տեսակետից:
Նշենք, որ Պրալյակին դատել են Բոսնիայում խորվաթական ուժերի այլ ղեկավարների հետ։ Հաագայի դատարանի փաստաթղթերում խոսվում է մահմեդական բնակչության դեմ նրանց հանցագործությունների մասին։ Սերբերի դեմ հանցագործությունների մասին ոչինչ չի ասվում։ Միջազգային հրատարակությունները չեն հիշատակում նաև հենց մահմեդականների հանցագործությունների մասին։
Իսկ սերբական Kurir թերթը գրել է, որ Պրալյակն ամուսնացել է սերբ գրող Գորան Բաբիչի առաջին կնոջ հետ։ Գեներալը նրա երեխաներին մեծացրել է իր երեխաների նման։ Հենց նրանք են գտել են Պրալյակի վերջին գրությունը։ Գեներալը և Բաբիչը ընկերներ են եղել և միասին մեծացել Հերցեգովինայում։ 90-ականներին պատերազմը սկսվելուց հետո Պրալյակը թողել է Խորվաթիան և մեկնել Բելգրադ, գրում է Kurir թերթը։
