ԵՐԵՎԱՆ, 1 դեկտեմբերի — Sputnik. Եվրամիության հետ համաձայնագիր կնքելով` Հայաստանը չի փոխում քաղաքական վեկտորը: Այսօր ԱԺ-ում «Հայաստան-ԵՄ. համապարփակ և ընդլայնված գործընկերություն» թեմայով խորհրդարանական լսումների ժամանակ, պատասխանելով նոյեմբերի 24-ից հետո հնչող նման տեսակետներին, ասաց ՀՀ ԱԺ պատգամավոր Միհրան Հակոբյանը:
«Որոշ քաղաքական և քաղաքացիական շրջանակներ փորձ են անում ներկայացնել, որ Հայաստանը փորձում է փոխել իր քաղաքական և քաղաքացիական վեկտորը: Այդպես չէ: Հայաստանը, լինելով ԵԱՏՄ և ՀԱՊԿ անդամ, բարձր մակարդակի հարաբերութուններ է կառուցում եվրոպական քաղաքականության հետ: Սա է իրականությունը»,- ասաց Հակոբյանը:
Անդրադառնալով ՀՀ իշխանությունների հասցեին հնչող՝ քաղաքական կամքի բացակայության մասին մեղադրանքներին` ՀՀԿ խմբակցության անդամ պատգամավորը հիշեցրեց, որ նման հայտարարություններ այսօր հնչում են այն շրջանակներից, որոնք ժամանակին քննադատում էին նաև ԵԱՏՄ անդամակցելու Հայաստանի իշխանությունների որոշումը:
«Ժամանակին, երբ Հայաստանը ԵԱՏՄ անդամ էր դառնում, այդ մարդիկ պնդում էին, որ Արցախի հետ սահմանին լինելու են մաքսակետեր: Հետո այդ մաքսակետերը չեղան, իրենք էլ ներողություն չխնդրեցին: Երկար ժամանակ պնդում էին, թե համաձայնագիրը չի ստորագրվելու, քանի որ ՌԴ-ից «դաբրո» չկա: Հիմա համաձայնագիրը ստորագրվել է, ասում են` Հայաստանի իշխանությունը քաղաքական կամք չունի, որպեսզի այն իրականացնի»,- ասաց Հակոբյանը:
Ավարտելով ելույթը՝ պատգամավորը պնդեց, որ Հայաստանը համաձայնագիրը կյանքի կոչելու բավականաչափ կամք ունի:
ԱԺ-ում ընթանում են լսումներ՝ ՀՀ-ԵՄ համապարփակ և ընդլայնված գործընկերության համաձայնագրի շուրջ: Դրանք կազմակերպվել են ԱԺ արտաքին հարաբերությունների և եվրոպական ինտեգրման հարցերի մշտական հանձնաժողովների համատեղ նախաձեռնությամբ, «Կոնրադ Ադենաուեր» հիմնադրամի հայաստանյան մասնաճյուղի աջակցությամբ:
Հայաստանի և Եվրամիության միջև Համապարփակ և ընդլայնված գործընկերության համաձայնագիրը ստորագրվեց նոյեմբերի 24-ին։
