ԵՐԵՎԱՆ, 1 նոյեմբերի – Sputnik. Ստորագրելով ՀՀ-ԵՄ համապարփակ և ընդլայնված գործընկերության համաձայնագիրը՝ Հայաստանը նպատակ չի հետապնդում հակադրելու իր գործընկերների և բարեկամների շահերը: Այսօր ԱԺ-ում «Հայաստան-ԵՄ. համապարփակ և ընդլայնված գործընկերություն» թեմայով խորհրդարանական լսումների ժամանակ ասաց ՀՀ ԱԺ նախագահ Արա Բաբլոյանը:
«Հայաստանը երբևէ չի գնացել իր բարեկամների կամ գործընկերների շահերը միմյանց հակադրելու ճանապարհով: Հակառակը, մենք մշտապես ձգտել ենք համադրել այդ շահերը»,- ասաց նա:
ԱԺ նախագահի խոսքով, Հայաստանը կարևորում է նաև եվրոպական անվտանգության համակարգը՝ համագործակցելով այդ կառույցի տարբեր ձևաչափերով իրականացվող ծրագրերի հետ:
«Ժամանակակից եվրոպական համակարգը հիմնվում է ԵՄ, ԵԱՀԿ և ՆԱՏՕ եռանկյունու վրա: Ընդ որում, ԵԱՀԿ-ն արցախյան հակամարտության ամենաակտիվ մասնակիցն է՝ ի դեմս հակամարտության կարգավորմամբ զբաղվող միջազգային մանդատ ունեցող միակ կառույցի՝ ԵԱՀԿ ՄԽ- համանախագահության: Մյուս կողմից մեզ համար կարևոր նշանակություն ունի հետխորհրդային և ԱՊՀ տարածքում անվտանգության գլխավոր երաշխավոր կազմակերպությունը՝ ՀԱՊԿ-ն: ՀՀ-ը լավագույնս կարող է հավասարակշռել համագործակցությունը անվտանգության այս երկու համակարգերի հետ՝ միաժամանակ որոշակի դեր ունենալով նաև դրանց միջև առկա խնդիրների հարթեցմանը նպաստելու գործում»,- ասաց նա:
Հայաստանը, Բաբլոյանի դիտարկմամբ, եվրասիական տարածքի և միաժամանակ Եվրոպայի անբաժան մասը լինելով, չի կարող անմասն լինել ինչպես եվրասիական, այնպես էլ համաեվրոպական գործընթացներին: Հայաստանը, ՀՀ ԱԺ նախագահի համոզմամբ, պետք է կայուն և վստահելի հարաբերութուններ ստեղծի իր գործընկերների, այդ թվում՝ ընդհանուր սահման չունեցող գործընկերների միջև՝ կոտրելով առկա կարծրատիպերը:
«Հայաստանը պատրաստ է կոտրել առկա կարծրատիպերը», — վստահեցրեց Բաբլոյանը:
ՀՀ ԱԺ-ն այսօր լսումներ է կազմակերպել ՀՀ-ԵՄ համապարփակ և ընդլայնված գործընկերության համաձայնագրի շուրջ: Լսումները կազմակերպվել են ԱԺ արտաքին հարաբերությունների և եվրոպական ինտեգրման հարցերի մշտական հանձնաժողովների համատեղ նախաձեռնությամբ, «Կոնրադ Ադենաուեր» հիմնադրամի հայաստանյան մասնաճյուղի աջակցությամբ:
