ԵՐԵՎԱՆ, 1 դեկտեմբերի — Sputnik. ԵՄ-ն մեզ համար բանկոմատ չէ, թեպետ ՀՀ-ԵՄ համաձայնագրի ֆինանսատնտեսական մասը շատ կարևոր բաղկացուցիչն է: ԱԺ-ում ընթացող ՀՀ-ԵՄ համաձայնագրին նվիրված լսումների ժամանակ ասաց նա ՀՀԿ փոխնախագահ, ԱԺ պատգամավոր Արմեն Աշոտյանը:
Նշենք, որ մինչ այդ ելույթ ունեցող ՀՀ տնտեսական զարգացման և ներդրումների նախարարի տեղակալ Գարեգին Մելքոնյանն ԱԺ ամբիոնից հայտարարել էր, որ 2016-ին ԵՄ-ն Հայաստանին որպես բյուջետային աջակցություն է տրամադրել 27,5 մլն եվրո, այս տարի՝ 15-17 մլն: Հաջորդ տարվա համար ևս տրամադրելու է, բայց չափի շուրջ բանակցությունները դեռ ավարտված չեն:
Ինչ վերաբերում է ՀՀ-ԵՄ համապարփակ և ընդլայնված գործընկերության համաձայնագրի վավերացման գործընթացին, այս հարցում Արմեն Աշոտյանը խնդրեց ԱԺ լսումներին ներկա, Հայաստանում աշխատող դիվանանգետներին՝ նրանց կոչ անելով աշխատել more for more (ավելին՝ ավելիի դիմաց) սկզբունքով և աջակցել Հայաստանին՝ ԵՄ-ի հետ համաձայնագրի վավերացման հարցում:
«Ինչ եմ ակնկալում մեր դեսպանատներից: Աջակցություն ազգային մակարդակով, ազգային խորհրդարաններում վավերացման գործընթացն արագացնելու համար»,- ասաց Աշոտյանը:
Աշոտյանը նշեց, որ շտապելու պատճառը Եվրախորհրդարանի լիազորությունների ավարտին մոտեցող ժամկետն է:
«Մենք պետք է անմեն ինչ անենք, որպեսզի ԵԽ այս գումարումը հասցնի այն անել, որովհետև 2019թ-ի հունիսի սկզբին ԵԽ նոր ընտրություններ են լինելու, և, եթե մեր եվրոպացի գործընկերները մինչ այդ չհասցրեցին անել այդ ժամկետում, ապա այն կարող է ոչ մեր, այլ եվրոպական քաղաքական ցիկլի պատճառով հետաձգվել»,- ասաց Աշոտյանը՝ հավելելով, որ դրանում ոչ ոք շահագրգռված չէ:
Գործող կարգի համաձայն, համաձայնագիրը պետք է վավերացնեն ԵՄ անդամ բոլոր 28 երկրների խորհրդարանները, որից հետո այն կդրվի նաև ԵԽ նիստի օրակարգ:
