ԵՐԵՎԱՆ, 1 դեկտեմբերի — Sputnik. ԵՄ-ն շատ լավ գիտի, որ Հայաստանը բարեկամական հարաբերություններ ունի պատժամիջոցների ներքո գտնվող Իրանի հետ և ԵԱՏՄ անդամ է: Եվ, այդուհանդերձ, նոյեմբերի 24-ին Հայաստանի հետ ստորագրեց համապարփակ և ընդլայնված գործընկերության համաձայնագիր: Ըստ ԱԺ պատգամավոր Արտաշես Գեղամյանի, Եվրոպան սրանով իր մեսիջը հղեց Ռուսաստանին՝ Հայաստանի միջոցով:
«Ի՞նչ է սա: Սա ԵՄ-ի կողմից մեսիջ է ՌԴ–ին, որ ԵՄ-ն տնտեսական առումով ոչ մի խոչընդոտ չի տեսնում ԵԱՏՄ-ի հետ նման պայմանագիր կնքելու, որը երբեք ու երբեք չի հակասելու երկու կողմերի՝ ԵԱՏՄ-ի ու ԵՄ-ի շահերին»,- ասաց Գեղամյանը:
Եվ, քանի որ այդ մեսիջը հղվում է Հայաստանի միջոցով, Արտաշես Գեղամյանը դրանում տեսնում է Հայաստանի վարած քաղաքականության կարևոր ձեռքբերումը:
Աժ պատգամավորն իր տեսակետը հիմնավորեց՝ հիշեցնելով ԵՄ արտաքին քաղաքականության և անվտանգության հարցերով բարձր ներկայացուցիչ Ֆեդերիկա Մոգերինիի այն արտահայտությունը, թե համաձայնագիրը շահավետ է նաև Եվրոպայի համար:
ԱԺ-ն այսօր հրավիրել է լսումներ՝ ՀՀ-ԵՄ համապարփակ և ընդլայնված գործընկերության համաձայնագրի շուրջ, որին մասնակցում են ՀՀ քաղաքական, հասարակական կազմակերպությունների ներկայացուցիչները, ՀՀ-ում ներկայացված դիվանագիտական կորպուսը անդամները:
