ԵՐԵՎԱՆ, 1 դեկտեմբերի — Sputnik. Հայաստանի մայրաքաղաքում զգացվում է անցած դարերի նրբագեղությունը, գրում է Livemint Հնդկաստանի առաջին գործարար պարբերականը։
«Երևանը վարդագույն է «հագել», ավելի ճիշտ` դրա տարբեր երանգները… Երևանցիները հպարտանում են, որ իրենց քաղաքը Հռոմից էլ հին է։ Ու դա անհիմն հայտարարություն չէ։ Մինչ մեր օրերը պահպանված հնագույն մայրաքաղաքներից մեկը հիմնվել է մեր թվարկությունից առաջ 782 թվականին», – նշում է հոդվածի հեղինակը։
Նա Սիրա անունով զբոսավարի խոսքերն է մեջբերում. «Երևան այնքան հին է, որ մեր առաջին զբոսաշրջիկը Նոյն էր»։
Հոդվածի հեղինակը գրում է, որ Հանրապետության Հրապարակի ճարտարապետությունը նեոդասական ոճով է արված, ժամանակակից քաղաքը սկսել է կառուցվել 1920–ական թվականներին, գլխավոր ճարտարապետ Ալեքսանդր Թամանյանի նախագծով։
«Երաժշտական երկվորյակ քաղաքների` Վյենի ու Փարիզի օրինակից ոգեշնչված` Թամանյանը կառուցել է իր գլուխգործոցը` Օպերայի ու բալետի թատրոնը։ Դա հիանալի կլոր շենք է` երկու համերգային դահլիճերով», – ընդգծում է հեղինակը։
Նա նաև հավելում է, որ Օպերայի շենքից ոչ շատ հեռու գտնվում է քաղաքի հնագույն փողոցներից մեկը` Աբովյանի փողոցը։
«Այդ փողոցի մթնոլորտն (այնտեղ գտնվում շքեղ հյուրանոցներ, թանկարժեք խանութներ, սրճարաններ, ռեստորաններ, ակումբներ) այնքան խիտ է, որ այն ասես կարելի է դանակով կտրել», – գրում է հնդիկ զբոսաշրջիկը։
Նրա խոսքով` Կասկադը հիշեցում է թանգարան բաց երկնքի տակ, որտեղ կարելի է տեսնել այնպիսի վարպետների աշխատանքներ, ինչպիսն են` Ֆերնանդո Բոտերոն, Բարի Ֆլենագանը, Լինն Չեդվիգը։
«Ինձ համար նորություն էր հասարակական վայրում այդ քանակությամբ արվեստի գործեր տեսնել։ Հնդկաստանում այդպիսի աշխատանքները միայն թանգարաններում են։ Իսկ այստեղ, մաքուր օդին դրանք թարմ, դինամիկ ու շատ ինդիվիդուալ տեսք ունեն», – նշում է նա։
Հրապարակման հեղինակը նաև մանրամասն նկարագրում է հայկական մայրաքաղաքում անցկացրած իր վերջին օրը, որն անցել է հայտնի «Վերնիսաժում»։ Այստեղ կարելի է գտնել հնաոճ իրեր, կտավներ, գորգեր, արծաթե իրեր, ազգային տիկնիկներ ու ձեռքի աշխատանք երաժշտական գործիքներ։
Նա հավելում է, որ հայերի համար մեծ նշանակություն ունի ազգային գործիքը` դուդուկը, առանց որի չի անցնում ոչ մի ընտանեկան միջոցառում։
