Համենայն դեպս, Քեմալ Քըլըչդարօղլուն`թուրքական ընդդիմադիր Ազգային հանրապետական կուսակցության առաջնորդը, կարծում է, որ նախօրեին իր հրապարակած փաստաթղթերի ինֆորմացիան լիովին հաստատվում է։ Էրդողանի փաստաբանը, բնականաբար, ընդդիմադրության ներկայացուցչի փաստաթղթերը կեղծիք է անվանում։
Հիշեցնենք, որ օրերս, երբ Էրդողանին հասցեագրվեցին մեղադրանքներ, թե նա մեծ գումարներ է օֆշորներ տեղափոխել, նա` իրեն բնորոշ տաքարյունությամբ, հայտարարեց, որ հրաժարական կտա, եթե որևէ ապացույց ներկայացվի։ Իսկ աղմուկը սադրողը հենց ինքն էր. նա կոչ էր արել դոլարները լիրայի վերածել` ի նշան հայրենասիրության, իբր Թուրքիան դրանից միայն կշահի։ Ընդդիմությունը վրդովվեց ու սկսեց փորել։
Ու ահա թուրքական ազդեցիկ Cumhuriyet թերթի կայքը նոյեմբերի 29–ին հայտնեց, որ Քըլըչդարօղլուն իր կուսակցության խորհրդարանական խմբակցության նիստի ժամանակ ներկայացրել է Էրդողանի օֆշորային գործարքների ապացույցը։ Այդ իրավիճակի համար տեղին պաթոսով ընդդիմադիր Քըլըչդարօղլուն կոչ է արել նախագահին. «Եթե դուք մարդ եք` հրաժարական տվեք»։
Cumhuriyet պարբերականը Քըլըչդարօղլուի ճառից հատվածներ է մեջ բերում։ Նա ասել է, որ Էրդողանն ու նրա ընտանիքի հինգ անդամները` ներառյալ նախագահի որդին, 15 միլիոն դոլար են փոխանցել Bellway Limited ընկերությանը` Մեն կղզու օֆշորային գոտի։ Փոխանցումներն արվել են 20 օր ժամանակահատվածում` 2011 թվականի դեկտեմբերի 15–ից 2012 թվականի հունվարի 4–ը։
Հատուկ նշվում է, որ Bellway Limited Company ընկերությունը հիմնվել է 1 ֆունտ ստերլինգ կանոնադրական կապիտալով։ Փաստաթղթերը ներկայացնելիս` Քըլըչդարօղլուն ասել է. «Սրանք բանկերի պաշտոնական գրառումներ են։ Նրանք այդ գումարները արտասահման են ուղարկել։ Դա գրանցված է նաև ընկերության հաշիվներում»։
Անկասկած, Էրդողանն այդ ամենը ժխտելու է, թեև ընդդիմության արած հետաքննություն էլ չի կարելի վերին ատյանի ճշմարտություն համարել։ Աշխարհում քիչ երկրներ կան, որոնց պաշտոնյաները կատարյալ ազնիվ են, ավելի պակաս ազնիվ են քաղաքական գործիչները, որոնք պատասխան ունեն, նույնիսկ եթե նրանց բռնացրել են «հանցանքի վայրում»։
Հաճախ բոլորն ամեն ինչից լավ տեղյակ են, նույնիսկ կարող են ապացուցել, սակայն քչերը կհամարձակվեն գլուխները ցավի տակ դնել։ Դա ոչ միայն Թուրքիայի խնդիրն է։ Հենց միայն այդ պատճառով Քեմալ Քըլըչդարօղլուի արարքը հարգանքի է արժանի։ Այն դեպքում, իհարկե, եթե նրա ներկայացրած փաստաթղթերը իրական են։
Եթե դրանք կեղծ լինեն, իրական ապացույցներին կարող են և չհավատալ։
