ԵՐԵՎԱՆ, 30 նոյեմբերի — Sputnik. Արմեն Ջիգարխանյանի նախկին կինը` Վիտալինա Ցիմբալյուկ-Ռոմանովսկայան, վաղուց էր ուզում սնանկացնել ԽՍՀՄ ժողովրդական արտիստին, ռուսական «Пусть говорят» (Թող խոսեն) հաղորդման եթերում հայտնել է դերասանի փաստաբան Եվգենի Պարֆյոնովը։
Նրա խոսքով` Վիտալինան 2015 թվականից գումարներ է հանել Ջիգարխանյանի հաշիվներից։
«Ես այս պահին չեմ մեկնաբանում, թե ինչպես է նա արել այդ` լիազորագրով, Ջիգարխանյանի համաձայնությամբ, թե առանց դրա, բայց փաստն եմ արձանագրում։ Այդ միջոցները հետագայում հայտնվել են նրա հաշիվների վրա։ Ենթադրում եմ, որ Վիտալինա Վիկտորովնան փողասեր է, նա պաթոլոգիկ հետաքրքրություն ունի փողի նկատմամբ», — նշել է Պարֆյոնովը` ավելացնելով, որ Ջիգարխանյանի նախկին կինը գումարներ էր ստացել նաև բնակարանների վաճառքից։
«Այլ հարց կլիներ, եթե դա ամուսնության ընթացքում ձեռք բերված գույք լիներ», — ասել է փաստաբանը։
Պարֆյոնովի խոսքով, Վիտալինային զարմացրել է, որ Արմեն Բորիսովիչը ամուսնալուծության մասին որոշում է կայացրել։
«Հոկտեմբերի սկզբից ես զբաղվում եմ այս աղմկահարույց գործով և աշխատում եմ փաստաթղթերի ու ապացույցների հետ… Ես ստացել եմ Արմեն Բորիսովիչի համաձայնությունը և եկել եմ այս հաղորդմանը, թեև դա դուրս է իմ կանոններից։ Վիտալինա Ցիմբալյուկ-Ռոմանովսկայան վաղուց էր պատրաստվում սնանկացնել Արմեն Բորիսովիչին։ Փաստեր կան։ Ես` որպես փաստաբան, որ համապատասխան իրավասություններ ունի, կարող էի համապատասխան հարցում կատարել բանկային հաստատություններ` կապված Արմեն Բորիսովիչի քարտային շարժի հետ», — ավելացրել է Ջիգարխանյանի փաստաբանը։
Նույն հաղորդմանը տված բացառիկ հարցազրույցի ժամանակ Արմեն Ջիգարխանյանը նշել է, որ մի շարք հարցերի պատասխաններ չունի։
Դերասանի փաստաբանը նաև հայտնել է, որ հայց է նախապատրաստում ենթադրյալ խարդախության փաստով, քանի որ Ցիմբալյուկ-Ռոմանովսկայան չարաշահել է նրա վստահությունը։
Մի քանի շաբաթ շարունակ հասարակությունը քննարկում է Արմեն Ջիգարխանյանի ու նրա երիտասարդ կնոջ շուրջ ծավալված սկանդալը։ Դերասանը հայտարարել է, որ կինը խաբեությամբ յուրացրել է փողերը, իր անունով դարձրել անշարժ գույքն ու մահափորձ կազմակերպել։
Վիտալինան իր հերթին հայտարարել է, որ որևէ հարցում մեղավոր չէ, ավելին` նա կատարվածի համար մեղադրում է Ջիգարխանյանին շրջապատող մարդկանց։
Նշենք, որ նոյեմբերի 27-ին Մոսկվայի Կունցևոյի 202-րդ շրջանի դատական տեղամասը բավարարել է դերասան և ռեժիսոր Արմեն Ջիգարխանյանի ու Վիտալինա Ցիմբալյուկ-Ռոմանովսկայայի ամուսնալուծության դիմումը։
