ԵՐԵՎԱՆ, 30 նոյեմբերի — Sputnik. Արմեն Ջիգարխանյանի կինը` Վիտալինա Ցիմբալյուկ-Ռոմանովսկայան, հայտնել է, որ այլևս չի սիրում ամուսնուն, այդ մասին նա ասել է ТВЦ հեռուստաալիքին տված հարցազրույցում։
Նոյեմբերի 27-ին Մոսկվայի Կունցևոյի 202-րդ շրջանի դատական տեղամասը բավարարել է դերասան և ռեժիսոր Արմեն Ջիգարխանյանի ու Վիտալինա Ցիմբալյուկ-Ռոմանովսկայայի ամուսնալուծության դիմումը։ Դատարանի որոշումն ուժի մեջ կմտնի որոշումից մեկ ամիս հետո, այսինքն` դեկտեմբերի 27-ին։
Հաղորդավարուհու այն հարցին, թե արդյոք մարե՞լ է Ջիգարխանյանի նկատմամբ սերը, Վիտալինան պատասխանել է. «Այո, նույն օրը»։
«Իմ անվան շուրջ զրպարտություններ են պտտվում, պատիվս վերականգնելու խնդիր չունեմ, քանի որ ես որևէ վատ բան չեմ արել, որևէ վնաս չեմ հասցրել, ոչ մի անգամ չեմ խայտառակել ամուսնուս… Ես, անկեղծ ասած, ոչ մի բանից չեմ վախենում։ Առավել ևս, հիմա», — ավելացրել է նա։
Կիրակի օրը, երբ եթեր դուրս գա հարցազրույցի ամբողջական տարբերակը, Վիտալինայի մասին ավելի շատ բան հայտնի կդառնա։
Մի քանի շաբաթ շարունակ հասարակությունը քննարկում է Արմեն Ջիգարխանյանի ու նրա երիտասարդ կնոջ շուրջ ծավալված սկանդալը։ Դերասանը հայտարարել է, որ կինը խաբեությամբ յուրացրել է փողերը, իր անունով դարձրել անշարժ գույքն ու մահափորձ կազմակերպել։
Վիտալինան իր հերթին հայտարարել է, որ որևէ հարցում մեղավոր չէ, ավելին` նա կատարվածի համար մեղադրում է Ջիգարխանյանին շրջապատող մարդկանց։
