ԵՐԵՎԱՆ, 30 նոյեմբերի — Sputnik. Երեկ ՀՀ նախագահի ստորագրումից հետո իրավական ուժ ստացած «Զինվորական ծառայության և զինծառայողի կարգավիճակի մասին» ՀՀ օրենքն այլևս փոփոխության ենթակա չէ։ Այսօր, պատասխանելով օրենքում փոփոխությունների հնարավորության մասին հարցին, լրագրողների հետ զրույցում ասաց ՀՀ ԿԳ նախարար Լևոն Մկրտչյանը։
«Բայց կա ենթաօրենսդրական դաշտ, որտեղ բոլոր խնդիրները կփորձենք կարգավորել»,– ասաց նախարարը։
«Զինվորական ծառայության և զինծառայողի կարգավիճակի մասին» ՀՀ օրենքի ընդունումից հետո դրա կիրառման ու դրանով նախատեսված նոր իրողությունների ներդրման շուրջ քննարկումները պատկան կառույցներում շարունակվում են։
Նոյեմբերի 22-ին, ԱԺ –ում ուսանողների հետ քննարկման ավարտին ԱԺ փոխնախագահ Էդուարդ Շարմազանովը հայտնել էր, որ առկա հարցերին լուծումներ գտնելու համար ստեղծվել է հատուկ աշխատանքային խումբ և առաջարկել նախաձեռնության անդամներին ևս մասնակցել դրա աշխատանքներին։
Հիշեցնենք` նոյեմբերի 15-ին խորհրդարանն ընդունեց «Զինվորական ծառայության և զինծառայողի կարգավիճակի մասին» ՀՀ օրենքը։
«Հանուն գիտության զարգացման» նախաձեռնության անդամներն ընդդեմ օրինագծի դասադուլ, ապա նաև հացադուլ էին կազմակերպել։ Չնայած դրան, ԱԺ–ն ընդունեց օրենքը` ներկայացված տեսքով, իսկ նոյեմբերի 29-ին ՀՀ նախագահը ստորագրեց այն։
«Զինվորական ծառայության և զինծառայողի կարգավիճակի մասին» օրենքով վերացվում է ՀՀ պետական բուհերում պետպատվերով սովորող ուսանողների համար մինչ այժմ գործող տարկետման իրավունքը։
