ԵՐԵՎԱՆ, 30 նոյեմբերի — Sputnik. Հայաստանում տուրքեր են սահմանելու կոնյակի ներմուծման համար (չշփոթել ակցիզների հետ)։ «Պետական տուրքի մասին» օրենքի համապատասխան փոփոխության նախագծին հավանություն տվեց կառավարությունը։
Ակցիզը (յուրաքանչյուր շշի համար) գործում է բոլոր ոգելից խմիչքների համար, այդ թվում նաև ներկրվող կոնյակի։ Իսկ տուրքեր (գործունեության իրավունքի համար) գանձվում են կոնյակի արտադրողներից, բայց ներկրողներից` ոչ։
Կոնյակը թորելու իրավունք ստանալու համար տեղի գործարանները տարեկան 15 մլն դրամ տուրք են վճարում։ Իսկ կոնյակ ներմուծելու իրավունք ունենալու համար ոչինչ վճարել պետք չէ։
Ու թեև ներկրվող կոնյակը հայկական շուկայում 1-2 տոկոս է կազմում, այն պաշտպանել պետք չէ։ Կառավարությունը համարում է, որ տեղականն ու ներկրվողը պետք է հավասար տուրքեր ունենան։
Միևնույն ժամանակ կփոխվի նաև տուրքի չափը. 15 մլն դրամից կնվազի մինչև 5 մլն առաջին 100 հազար լիտրի դիմաց (100%-ի հաշվարկով)։ Յուրաքանչյուր հաջորդ լիտրի դիմաց հարկ կլինի վճարել 50-ական դրամ մանրածախ կոնյակի համար (մինչև 2լ շիշ)։ Իսկ կիսաֆաբրիկատի համար, այսինքն խոշոր տարաներով կոնյակի սպիրտի համար (հետագա շշալցման համար) պետք կլինի վճարել արդեն 300 դրամ։
«Այսինքն, մենք նախ ցանկանում ենք հավասար պայմաններ ստեղծել տեղական և ներկրվող արտադրանքի համար, երկրորդ` խթանել տեղական կոնյակի, այլ ոչ թե ներկրվող սպիրտից պատրաստած խմիչքների արտադրությունը», — ընդգծեց Առաքելյանը։
