ԵՐԵՎԱՆ, 28 նոյեմբերի — Sputnik. Հայտնի դերասան Արմեն Ջիգարխանյանի ու Վիտալինա Ցիմբալյուկ-Ռոմանովսկայայի ամուսնալուծությունից հետո բոլորին սկսեց հետաքրքրել, թե ինչ կմնա Ջիգարխանյանին։ Այս մասին գրում է Vesti.ru-ն։
Վիտալինայի ներկայացուցիչ Էլինա Մազուրը վստահեցնում է, որ այն ամենը, ինչ ունի Ցիմբալյուկը, ձեռք է բերվել ամուսնությունից առաջ, և համատեղ կյանքի ընթացքում ձեռք բերած գույքի մասին խոսք լինել չի կարող։
«Վերջերս նրա ընկերները հայտարարեցին, որ բնակարան են նվիրել դերասանին։ Ստացվում է, որ նա տուն ունի։ Հիմա, երբ ամուսնալուծվել են, որտե՞ղ պիտի գրանցվի Արմեն Բորիսովիչը, որը դեռ գրանցված է Վիտալինայի ` Մոլոդոգվարդեյսակայա փողոցի բնակարանում։ Այդ հարցը ես տվեցի Ջիգարխանյանի փաստաբան Եվգենի Պարֆյոնովին։ Նրա ասածից հասկացա, որ ԽՍՀՄ արտիստը գրանցվելու տեղ չունի։ Այժմ նա պանսիոնատում է։ Իսկ որտե՞ղ պիտի ապրի հետո»,- ասել է Մազուրը «Կոմսոմոլսկայա պրավդային» տված հարցազրույցում։
Նա նաև պատասխանել է այն հարցին, թե Վիտալինան մտադի՞ր է իր բնակարանից դուրս գրել դերասանին։
«Մենք գազան չեք, իհարկե, դուրս չենք գրի։ Ավելին, Վիտալինան պատրաստ է նրան ընդունել իր տանը»,- ավելացրել է Մազուրը։
Նրա խոսքով, «Արմեն Բորիսովիչն ապրելու տեղ չունի», և ընկերների` բնակարանի մասին պատմածն առասպել է։ Բայց այս հարցում վիճելի պահ կա` Մոսկվայի Ստորոկոնյուշեննի նրբանցքում գտնվող բնակարանի վաճառքից Ջիգարխանյանն իր մասնաբաժինը չի ստացել, իսկ Վիտալինան էլ իր մասնաբաժինը չի ստացել ամուսնության ժամանակ իրականացված կոմերցիոն գործարքի եկամտից։
Ամբողջ գույքը գրանցված է Վիտալինայի անունով։ Ռուսական ԶԼՄ-ների տվյալով, ամուսնությունից առաջ Վիտալինան բանկային հաշիվներից չորս միլիոն ռուբլի է հանել։
Պրոդյուսեր Մարկ Ռուդինշտեյնը` Արմեն Ջիգարխանյանի ընկերը, վստահ է, որ դերասանի անվան շուրջ ստի շղթա է հյուսվում, որը ղեկավարում է ոչ թե «այս գավառացի աղջիկը, այլ Մազուրը»։ Նրա խոսքով, Վիտալինան ոչ թե 4, այլ 10 միլիոն ռուբլի է «թռցրել»։
Մի քանի շաբաթ շարունակ հասարակությունը քննարկում է Արմեն Ջիգարխանյանի ու նրա երիտասարդ կնոջ շուրջ ծավալված սկանդալը։ Դերասանը հայտարարել է, որ կինը խաբեությամբ յուրացրել է փողերը, իր անունով դարձրել անշարժ գույքն ու մահափորձ կազմակերպել։ Վիտալինան իր հերթին հայտարարել է, որ որևէ հարցում մեղավոր չէ, ավելին` նա կատարվածի համար մեղադրում է Ջիգարխանյանին շրջապատող մարդկանց։ Նշենք, որ երեկ` նոյեմբերի 27-ին, Մոսկվայի Կունցևոյի 202-րդ շրջանի դատական տեղամասը բավարարել է դերասան և ռեժիսոր Արմեն Ջիգարխանյանի ու Վիտալինա Ցիմբալյուկ-Ռոմանովսկայայի ամուսնալուծության դիմումը։
