ԵՐԵՎԱՆ, 27 նոյեմբերի — Sputnik. Արմեն Ջիգարխանյանի կինը` Վիտալինա Ցիմբալյուկ-Ռոմանովսկայան, կմեկնի Փարիզ` երեխա ունենալու նպատակով։ Այս մասին հայտնում է հաղորդավար Անդրեյ Մալախովի կայքը` Starhit-ը։
Առցանց պարբերականի տվյալով, Ցիմբալյուկը պատրաստվում է արմատապես փոխել իր կյանքը։ Ջիգարխանյանի կնոջ պաշտոնական ներկայացուցիչ Էլինա Մազուրը պատմել է, որ Վիտալինային աշխատանք են խոստացել Ֆրանսիայում։ Նա նաև ավելացրել է, որ Վիտալինան շուտով կմեկնի Եվրոպա պայմանագրի պայմաններին ծանոթանալու համար։
«Վիտալինային կանչում են Ֆրանսիա և Գերմանիա։ Մի մոռացեք, որ նա պրոֆեսիոնալ, տաղանդավոր դաշնակահարուհի է։ Նրան ավելի շատ դուր է գալիս առաջին տարբերակը, դեկտեմբերի կեսին նա ծրագրում է մեկնել Փարիզ, որպեսզի ծանոթանա պայմանագրի պայմաններին։ Մոսկվայում նա բնակարաններ է գնել և շուտով կավարտի վերանորոգման աշխատանքները։ Իսկ Ջիգարխանյանը վարձակալած բնակարաններ է փոխում։ Նրան ոչ մի տեղ դուր չի գալիս. նոր տեղում մի քանի օր մնալուց հետո վերադառնում է թատրոնի իր սենյակ»,- ասել է Մազուրը։
Նրա խոսքով, Ջիգարխանյանի ընկերներն արդեն ավելի քան միլիոն ռուբլի են ծախսել վարձակալած բնակարանների համար։
Ջիգարխանյանի և Ցիմբալյուկի ամուսնալուծության դատական նիստը նախատեսված է այսօր` նոյեմբերի 27-ին։
Ավելի վաղ ԶԼՄ-ներում տեղեկություն էր հրապարակվել, որ դերասանին հոսպիտալացրել են, որ նրա վիճակը վատացել է կնոջից բաժանվելուց հետո։ Վիտալինայի կողմնակիցների պնդմամբ, ընտանիքում սկսված տարաձայնություններից առաջ Ցիմբալյուկ-Ռոմանովսկայան գոլորշու վրա էր սնունդ պատրաստում նրա համար և գդալով կերակրում։ Նրա ընկերների խոսքով, նույնիսկ զոքանչն էր Ջիգարխանյանի համար եփում նրա սիրած լոռամրգի կոմպոտը։ Սակայն բաժանումից հետո սննդի բազմամյա ռեժիմը փոխվել է մշտական սթրեսային վիճակով, քանի որ դերասանի անձնական կյանքը դարձել է թիվ մեկ քննարկվող թեման թեժ լուրերի սիրահարների համար։
Ավելի ուշ Ջիգարխանյանի ընկեր Արթուր Սողոմոնյանը հերքել էր հոսպիտալացման մասին լուրերը` տեղեկացնելով, որ դերասանը հանգստանում է պանսիոնատում և իրեն լավ է զգում։
