ԵՐԵՎԱՆ, 28 նոյեմբերի — Sputnik. Հայաստանը ԵՄ-ի հետ համաձայնագիր է ստորագրել իր ինքնիշխանության շրջանակում, Հայաստանի և Ռուսաստանի իշխող կուսակցությունների պատգամավորների հետ երևանյան հանդիպումից հետո ասաց «Միասնական Ռուսաստանի» պատգամավոր, Պետդումայի միջազգային հարցերով կոմիտեի անդամ Սերգեյ Ժելեզնյակը։
Ավելի վաղ նա հայտնել էր, որ Ռուսաստանի Դաշնությունը կողմ է, որ հարաբերությունները զարգացնի «և՛,և՛»-ի, ոչ թե «կա՛մ, կա՛մ»-ի քաղաքականության շրջանակում։
«Սա մեր կուսակցության դիրքորոշումն է, որը համահունչ է Ռուսաստանի գործադիր իշխանության, ԱԳՆ-ի ղեկավարության դիրքորոշմանը»,- ասաց Ժելեզնյակը։
Նրա խոսքով, Ռուսաստանը մշտապես ելնում է առավելագույն համագործակցության և յուրաքանչյուր ինքնիշխան պետության ներուժի իրացման սկզբունքներից։
«Այդ առումով մեզ համար տարօրինակ էր արևմտյան երկրների, այդ թվում ԵՄ-ի դիրքորոշումը, որը փորձում էր հակազդել մեր համագործակցությանը»,- նշեց Ժելեզնյակը։
Նա նաև ընդգծեց, որ Հայաստանը` որպես ինքնիշխան պետություն, Ռուսաստանի հետ ավանդաբար կապող և ԵՄ-ի հետ ունեցած ներուժի իր մասն իրացնելու բոլոր իրավունքներն ու հնարավորություններն ունի։
Բացի այդ, Ժելեզնյակի խոսքով, ԵՄ-ի հետ համաձայնագրում ամեն ինչ հստակ արձանագրված է, որ փաստաթղթերը ոչ մի կերպ չեն կարող չեղարկել այն պայմանավորվածությունները, պարտականություններն ու պայմանավորվածությունները, որոնք Հայաստանը ստանձնել է համագործակցության այլ ձևաչափերում։ Եվ անվտանգության, մարդասիրական, տնտեսական համագործակցության համատեղ ապահովման հարցում Հայաստանն ու Ռուսաստանը ոչ միայն շարունակելու, այլև ընդլայնելու են գործակցությունը։
Գարեգին Նժդեհը «Միասնական Ռուսաստանի» համար
Ինչ վերաբերում է տարբեր ԶԼՄ-ներում հնչած կարծիքներին («Զվեզդա» հեռուստաընկերության եթերում հնչածի վերաբերյալ), ապա յուրաքանչյուր մարդ, ըստ Ժելեզնյակի, կարող է սեփական կարծիք ունենալ, այլ հարց է, որ դա մասնավոր անձի կարծիք է։
«Այս հարցում ես խորհուրդ կտայի կողմնորոշվել նախագահի մամուլի քարտուղարի, կառավարության ղեկավարի մամուլի ծառայության, ԱԳՆ ղեկավարության ու կուսակցությունների միջազգային գործունեության համար պատասխանատու անձանց ուղղությամբ»,- ասաց Ժելեզնյակը։
«Զվեզդա» հեռուստաընկերությունը ներողություն է խնդրել այն հաղորդման համար, որի ժամանակ վիրավորական արտահայտություններ են հնչել ՀՀԿ-ի և Գարեգին Նժդեհի հասցեին։
Բացի այդ, ռուսաստանյան հասարակական գործիչներն առաջարկել են միջազգային դատարան հայց ներկայացրել Ուկրաինայի, Հայաստանի, Լատվիայի ու Էստոնիայի դեմ, որտեղ իբր «ֆաշիզմի աջակիցների» հուշարձաններ են տեղադրված։
«Ես խորհուրդ կտայի բոլոր փորձագետներին` և՛ ռուսական, և՛ հայկական, այդ քայլն անելուց առաջ ավելի մանրակրկիտ ուսումնասիրել առաջնային աղբյուրները։ Պատմության մեջ ցանկացած մարդուն կամ իրադարձությանը չափազանց շատ բան է վերագրվում կամ սխալ ընկալվում։ Միջազգային դատարանին դիմելու որևէ հիմնավորում չկա»,- նշեց Ժելեզնյակը։
Նրա խոսքով, պետք է ուշադրություն դարձնել Նժդեհի` Ստալինին ու Վորոշիլովին գրած նամակներին։ Բացի այդ, ըստ նրա, Հայաստանի Հանրապետական կուսակցության կանոնադրության մեջ արմատական գաղափարախոսություն հիշեցնող ոչինչ չկա։
