ԵՐԵՎԱՆ, 27 նոյեմբերի — Sputnik. Շիայական «Ալ Խաշդ աշ-Շաաբի» խմբավորման անդամները Իրաքի քաղաքներից մեկում թալանել, ապա այրել են հայերի, քրիստոնյա արաբների և սունի քրդերի տները։
ԶԼՄ-ների տվյալներով` հարձակման արդյունքում մոտ 200 000 մարդ ստիպված են եղել փախչել արվարձաններ, որը գտնվում է Քրդստանի շրջանային ղեկավարության ներքո։ Փախուստի մեկնածների մեծ մասը Տուզ-Խուրմատ քաղաքից էին, որտեղ հարձակվողներն այրել են հարյուրավոր տներ։
Ինչպես Sputnik Արմենիային ասաց թուրք-քրդական հարցերով փորձագետ Կարեն Հովհաննիսյանը, ամենից շատ տուժել է Տուզ-Խուրմատ քաղաքը, որտեղ բնակչությունը կազմված էր քրդերից և սունի քրդերից, իսկ ավելի ուշ ավելացել են նաև հայեր։
«Շատ հայեր լքել են իրենց բնակավայրը, որովհետև նրանց ունեցվածքը թալանվել է, իսկ տները կրակի են տրվել։ Հիմնականում բնակիչները փախել են Էրբիլի կողմ»,-ասաց Հովհաննիսյանը։
Հայերի համար, ըստ Հովհաննիսյանի, ամենից շատ վտանգավոր է այն տարածքներում, որտեղ Իրաքի Սահմանադրության համաձայն ղեկավարվում են կենտրոնից, բայց իրականում դրանք գտնվում են քրդերի հովանու ներքո։
Ի դեպ, ճնշումները գործադրվում են ոչ թե ազգային, այլ կրոնական հողի վրա։ «Ալ Խաշդ աշ-Շաաբին», որը կազմված է շիա թուրքմեններից, բռնություն է գործադրում ինչպես սունիների, այնպես էլ քրիստոնյաների և եզդիների նկատմամբ։
Հովհաննիսյանը կարծում է, որ նման գործողությունների նախաձեռնողը հենց այս խմբավորումն է, այլ ոչ թե կենտրոնական իշխանությունը, որին նրանք ենթարկվում են։
«Ոչ վաղ անցյալում «Ալ Խաշդ աշ-Շաաբին» հանդես եկավ հայտարարությամբ, որտեղ ասված էր, որ երբ իրենց անդամներն «ավարտեն իրենց գործն» Իրաքում, կմեկնեն Արցախ և «կազատագրեն» այն իրենց ադրբեջանցի եղբայրների համար։
Հովհաննիսյանի խոսքով` քաղաքում տեղի ունեցածն արդեն միջազգային կազմակերպությունների ուշադրության կենտրոնում է, և կարելի է սպասել, որ մոտ ապագայում նրանք կպարտադրեն խմբավորմանը կամ զենքը վայր դնել, կամ հանգիստ թողնել քաղաքը։
Քրդական իշխանություններն ավելի շատ զբաղված են ինքնավարության պահպանման գործընթացով, որը փաստորեն, կորցրել են հանրաքվեից հետո։
«Հիմա նրանց քիչ է հետաքրքրում, թե ինչ է կատարվում բնակչության հետ։ Նրանք զբաղված են ինքնավարության փրկման գործով»,-ասաց Հովհաննիսյանը։
2016թ.-ի ամռանը ԻՊ-ի կազմում կռվող 16 թուրքմենական խմբավորումների ղեկավար Աբու Թայիր Պեշիրլին հայտարարել էր, որ «մոտ ապագայում խիզախ մարտիկների ու ժողովրդի հետ Ադրբեջանը հաջողության կհասնի նաև Ղարաբաղում»։
