Խաչիկ Չախոյան, Sputnik.
Պրեմիեր լիգայում վերջին տուրի՝ «Բրայթոնի» հետ խաղում հայ ֆուտբոլիստը խաղադաշտ դուրս եկավ հանդիպման 71-րդ րոպեին: Խաղից հետո անգլիական որոշ լրատվամիջոցներ նրա խաղին տվեցին ամենացածր գնահատականը:
Այն որ Մխիթարյանի խաղում որոշակի նահանջ կա, բացահայտ է: Առաջնության մեկնարկում հայ ֆուտբոլիստը բավականին լավ մարզավիճակում էր ու կարողանում էր օգտակար լինել իր թիմին: Ակտիվ էր խաղում, գոլային փոխանցումներ էր կատարվում: Այդ պատճառով էլ Ժոզե Մոուրինյոն նրան խաղադաշտ էր դուրս բերում հիմնականում մեկնարկային կազմում ու երկար խաղաժամանակ տալիս:
Վիճակագրությունը հուշում է, որ Անգլիայի առաջնությունում հայ ֆուտբոլիստը ոչ մի խաղում սկզբից մինչև վերջ խաղադաշտում չի եղել: Բայց ի տարբերություն առաջնության մեկնարկի, որի ընթացքում Հենրիխը փոխարինվում էր խաղի վերջնամասում, հետագայում նա սկսեց ավելի շուտ փոխարինվել և հետո էլ` երկու խաղերում անընդմեջ(«Նյուքասլ», «Բազել») չհայտնվեց նույնիսկ հայտացուցակում:
Պարզից էլ պարզ է, որ Հենրիխի խաղը չի գոհացնում Ժոզե Մոուրինյոյին: Եվ մարզիչն իր կարծիքը հայտնեց «Բրայթոնի» հետ խաղից առաջ` նշելով, որ ոչ միայն վերջին երկու հանդիպումներում է դժգոհ Միկիի ցուցադրած խաղից. «Վերջին երեք, չորս, հինգ խաղերում Հենրիխի խաղամակարդակը իջել է: Մրցաշրջանը նա շատ լավ սկսեց, բայց աստիճանաբար թուլացրեց իր խաղը»:
Հենրիխի մոտ հիմնական խնդիրը թիմի խաղային ձեռագրին հարմարվելն է: Մյուս կողմից էլ, եթե այդպես է, ապա մրցաշրջանի սկզբում ինչպես էր հայ ֆուտբոլիստը կարողանում խաղալ այնպես, ինչպես ուզում է Մոուրինյոն: Պորտուգալացի մարզչի թիմը խաղում է կա՛մ տիրելով նախաձեռնությանը, կա՛մ էլ դիմելով հակագրոհների: Ընդ որում, երկրորդ տարբերակն այնքան էլ լավ չի ստացվում մանկունյանցիների մոտ: Իսկ Հենրիխն իր լավագույն տարիներին «Շախտյորի» ու Դորտմունդի «Բորուսիայի» կազմում խաղում էր պրեսինգով արագ ֆուտբոլ` զրոյական դարձնելով թիմի կազմում փլեյմեյքերի դերը:
Հիմա 10 համարի դիրքում խաղալով` Մխիթարյանը պետք է կատարի հենց խաղի կազմակերպչի ու թիմի խաղը սրող ֆուտբոլիստի դերը: Այսինքն` անի այն, ինչը մանկունյանցիների կազմում ժամանակին անում էր Պոլ Սքոուլզը: Պրեմիեր լիգայում Հենրիխի մոտ, առավելապես ուժեղ թիմերի կազմում, առայժմ չի ստացվում աչքի ընկնելը: Սակայն չէր կարող ուղղակին առանց պատճառի հայ ֆուտբոլիստը կորցնել իր ունակությունները` կապված արագ մտածելու ու արագ գործելու հետ: Այսինքն`կորցնել այն, ինչը նրան արդեն իսկ համբավ է բերել:
Մոուրինյոն սիրում է հենվել ֆիզիկապես ուժեղ ֆուտբոլիստների վրա, որոնք ավելի շատ կարող են վազել ու ավելի շատ պայքարել գնդակի համար, ու դրա վառ օրինակը Պոլ Պոգբան է: Վնասվածքից ապաքինվելուց հետո Պոգբան անմիջապես հայտնվեց խաղադաշտում, բայց նրա կողքին Մոուրինյոն առայժմ չի տեսնում Հենրիխին: Մյուս կողմից էլ «Մանչեսթեր Յունայթեդի» կազմում կան բարձրակարգ ֆուտբոլիստներ, որոնց ներկայությունը հնարավորություն է տալիս Մոուրինյոյին ռոտացիայի դիմել ու լավ մարզավիճակում գտնվողներին դուրս բերել խաղադաշտ:
Շատերը արդեն շտապում են Հենրիխին ուղարկել այլ թիմեր: Ոմանք գտնում են, որ Մխիթարյանը կարող է տեղափոխվել իր նախկին թիմ՝ «Բորուսիա», ոմանք նրան արդեն ուղարկում են «Տոտենհեմ»: Այս ամենը միայն խոսակցություններ են: Հենրիխի արդեն մեկ անգամ Մանչեսթերում կարողացել է հաղթահարել խաղային ճգնաժամը, ինչու՞ չի կարող դա անել երկրորդ անգամ:
Ամեն ինչ համեմատության մեջ է: Առայժմ Մխիթարյանն իր խաղային դիրքում ու խաղով զիջում է Պրեմիեր լիգայի մյուս հայտնի ֆուտբոլիստներին՝ Քրիստիան Էրիկսենին, Դավիթ Սիլվային, Կևին դե Բռույնեյին: Բայց այն, որ նա կարող է հավասարվել վերը նշված ֆուտբոլիստների խաղամակարդակին, կասկածից վեր է: Այստեղ էլ ինձ թվում է, որ Մխիթարյանին կարող են միանշանակ օգնել խաղընկերները ու դա անել հենց խաղի ընթացքում:
Չեմ ուզում որևիցե ֆուտբոլիստի մեղադրել, բայց հանդիպումների ընթացքում մեկ անգամ չէ, որ Մխիթարյանը փոխանցում չի ստանում` գտնվելով ավելի լավ դիրքում, քան այն ֆուտբոլիստը, որի ուղղությամբ հետևում է գնդակը:
Ստացվում է, որ Մխիթարյանի խաղային ճգնաժամը պայմանավորված է մի քանի պատճառներով: Իր կարիերայի ընթացքում Հենրիխի մամուլի կողմից նման ճնշման արդեն արժանացել է, սակայն կարողացել է պատվով դուրս գալ այդ իրավիճակներից: Մխիթարյանը կիրթ ու աշխատասեր անձնավորություն է և այս անգամ էլ նա կարող է ոգևորության նոր ալիք բարձրացնել և՛ «Օլդ Տրոֆորդում», և՛ այն երկրպագուների շրջանում, որոնք հետևում են Մանչեսթերի 22 և Հայաստանի հավաքականի 18 համարի ֆուտբոլիստի խաղին:
