ԵՐԵՎԱՆ, 24 նոյեմբերի — Sputnik. Հայտնի դերասան և ռեժիսոր Արմեն Ջիգարխանյանը լավ է զգում և ուզում է հանգստանալ պանսիոնատում, ՌԻԱ Նովոստիին է պատմել նրա ընկեր Արթուր Սողոմոնյանը։
Արտիստի ներկայացուցչի խոսքով` Ջիգարխանյանը ծրագրել է երկու շաբաթ հանգստանալ պանսիոնատում։ Մոսկվայի դրամատիկական թատրոնի հիմնադիրը որոշել է Ամանորից առաջ պատրաստվել թատերական թեժ խաղաշրջանին։
«Պանսիոնատում ծանոթ բժիշկներ կան, մենք նրանց հետ կապ ենք պահպանում։ Քիչ առաջ զրուցում էի ղեկավարի հետ, նա գոհ է արտիստի վիճակից։ Արմեն Բորիսովիչը նույնպես լավ տրամադրություն ունի, երեկ մի փոքր վշտացած էր իր անվան շուրջ հերթական կեղծ լուրերից, բայց այսօր ամեն ինչ կարգին է», — ասել է Սողոմոնյանը։
Դերասանի ընկերոջ խոսքով` գեղարվեստական ղեկավարի բացակայության ժամանակ Ջիգարխանյանի թատրոնում նրա պարտականությունները կատարում է տնօրեն Ելենա Գիլվանովան, և ամեն առավոտ նրանք զրուցում են հեռախոսով։
Ավելի վաղ ԶԼՄ-ներում տեղեկություն էր հրապարակվել, որ դերասանին հոսպիտալացրել են, որ նրա վիճակը վատացել է կնոջից բաժանվելուց հետո։ Վիտալինայի կողմնակիցների պնդմամբ, ընտանիքում սկսված տարաձայնություններից առաջ Ցիմբալյուկ-Ռոմանովսկայան գոլորշու վրա էր սնունդ պատրաստում նրա համար և գդալով կերակրում։ Նրա ընկերների խոսքով, նույնիսկ զոքանչն էր Ջիգարխանյանի համար եփում նրա սիրած լոռամրգի կոմպոտը։ Սակայն բաժանումից հետո սննդի բազմամյա ռեժիմը փոխվել է մշտական սթրեսային վիճակով, քանի որ դերասանի անձնական կյանքը դարձել է թիվ մեկ քննարկվող թեման թեժ լուրերի սիրահարների համար։
Ավելի ուշ Ջիգարխանյանի ընկեր Արթուր Սողոմոնյանը հերքել էր հոսպիտալացման մասին լուրերը` տեղեկացնելով, որ դերասանը հանգստանում է պանսիոնատում և իրեն լավ է զգում։
