ԵՐԵՎԱՆ, 22 նոյեմբերի — Sputnik. Հայտնի բարիտոն Դմիտրի Խվորստովսկին կտակ է թողել, ըստ որի` նրա մարմինը պետք է դիակիզվի, այնուհետև թաղվի Մոսկվայում և հայրենի Կրասնոյարսկում։ Ըստ Vesti.ru-ի` համաշխարհային ճանաչում ունեցող երգչի վերջին կամքի մասին հայտնել է ԽՍՀՄ ժողովրդական արտիստ Իոսիֆ Կոբզոնը։
Խվորոստովսկին ցանկացել է, որ իր աճյունն ամփոփվի երկու քաղաքում։
Հայտնի երգչի մահվան կապակցությամբ ցավակցական խոսքեր են հնչում աշխարհի տարբեր անկյուններից։ Ուղերձ է հղել նաև ՌԴ Նախագահ Վլադիմիր Պուտինը։
Խվորոստովսկու մասին խոսել է հայտնի դիրիժոր Կոնստանտին Օրբելյանը։
«Նա ամեն ինչ անում էր ոչ թե 100, այլ 1000 %-անոց ճշգրտությամբ։ Նա ինքն իրեն գերազանցում էր։ Ամեն դեր, որ խաղում էր, դարձնում էր իրենը, ապրում էր այդ կերպարով։ Ցանկացած համերգի ժամանակ նա համերգասրահը լցնում էր դերասանական և զգացմունքային էներգիայով»,-ասել է Օրբելյանը։
Խվորոստովսկին մահացել է կյանքի 56-րդ տարում, ծանր ու երկար հիվանդությունից հետո։ Տևական ժամանակ Լոնդոնում ապրող երգիչը 2015թ.-ին հայտարարել էր, որ իր մոտ ծանր հիվանդություն է հայտնաբերվել` գլխուղեղի ուռուցք։
