ԵՐԵՎԱՆ, 11 նոյեմբերի–Sputnik, Գոհար Սարգսյան. Լիբանանի զբոսաշրջության նախարարն ազգությամբ հայ է։ Բայց դա չէ, որ նրան ստիպում է Հայաստանի հետ զբոսաշրջային կապերն ակտիվացնել։ Նա Հայաստանում տեսնում է այն պոտենցիալը, որը կգրավի բոլոր, իսկ մասնավորապես՝ լիբանանցի զբոսաշրջիկներին։ Sputnik Արմենիայի հետ զրույցում Լիբանանի զբոսաշրջության նախարար Ավետիս Կիտանյանը պատմեց` տեղի հայ համայնքը վայելում է լիբանանցիների հարգանքը։ Ամեն անգամ Հայաստան են այցելում, իսկ վերադարձին պատմում այդ հրաշք երկրի մասին ու այն տեսնելու ցանկություն առաջացնում լիբանանցիների մեջ։
«Բացի այդ, Հայաստանը, որպես քրիստոնյա, կրոնական վայրերով հարուստ երկիր, լիբանանցի քրիստոնյաների մեջ մեծ հետաքրքրություն է առաջացնում, մինչդեռ այստեղ քրիստոնյա լիբանանցիները ծայրահեղ են իրենց հավատքի առումով»,– ասաց Կիտանյանը։
Լիբանանցիների համար առաջնային են նաև ավիատոմսերի գները։ Այժմ զգալի մատչելի գներով կարող են ճամփորդել Լիբանան–Հայաստան ուղղությամբ։
«Մինչև անցյալ տարի Լիբանանից Հայաստան թռիչքներն իրականացվում էին մեկ ընկերության օգնությամբ, տոմսերի գները բավականին թանկ էին, այսինքն` ճամփորդելու համար միայն մեկ անձը պետք է վճարեր 600–650 դոլար։ Այսօրվա դրությամբ երկրորդ ավիաընկերությունը սկսեց թռիչքները, մրցակցության հետևանքով գները նվազեցին։ Արդեն ամռանը 400–450 դոլար դարձավ դեպի Հայաստան թռիչքի գինը»,– ասաց Կիտանյանը։
Նախարարը խոստացավ` այնպես են անելու, որ զբոսաշրջությունն էական նշանակություն ունենա Հայաստանի տնտեսության ցուցանիշների վրա։ Օրեր առաջ նա հանդիպում է ունեցել իր հայաստանյան գործընկերոջ` Զարմինե Զեյթունցյանի հետ ու խոստացել` հաջորդ տարվա գարնանը լիբանանյան մի շարք լրատվամիջոցների ներկայացուցիչներ կգան Հայաստան ու կնկարահանեն զբոսաշրջային գրավչությունը։
ՀՀ զբոսաշրջության պետական կոմիտեի նախագահ Զարմինե Զեյթունցյանը Sputnik Արմենիայի հետ զրույցում հաստատեց. լիբանանահայերը հեշտացնում են իրենց գործը` այդ երկրում մեծ հեղինակություն վայելելով։ Նրանց մնում է Հայաստանի մասին ճշգրիտ ու թիրախավորված տեղեկություն տարածելը։
«Այնտեղ մարոնիտների և ուղղափառների շատ լուրջ կրոնական համայնք կա, մոտավորապես՝ 1,5 միլիոնանոց շուկա։ Հանդիպել ենք նրանց խորհրդի նախագահների հետ։ Նրանք ոչ միայն Հայաստանը սիրում և հարգում են, այլև պատրաստ են այդ հավատացյալների զբոսաշրջությունն ուղղորդել Հայաստան»,–ասաց Զեյթունցյանը։
Տուրօպերատորների հետ հանդիպումն էլ այլ տեղեկություն հաղորդեց` լիբանանցիներին հետաքրքրում է պատմամշակութային Հայաստանը, բայց այստեղ կարող են գալ նաև ամուսնանալու համար։
«Քանի որ Լիբանանում չկա պսակադրության արարողություն, շատ հաճախ նրանք մեկնում են Վրաստան և Կիպրոս։ Մենք հիմա փորձում ենք հասկանալ և գտնել` արդյո՞ք հնարավոր է Հայաստանում ոչ հայազգի զույգերի պսակադրությունը»,– ասաց Զեյթունցյանը։
Այսօր գեոպոլիտիկ և քաղաքական իրադարձությունների պատճառով Սիրիայի, Լիբանանի, Իրաքի բնակչությունը շատ ավելի դժվար է ճամփորդում դեպի եվրոպական երկրներ ու Միացյալ Նահանգներ։ Հետևաբար, նրանց թիվը Հայաստանի ուղղությամբ այս տեսանկյունից էլ կարող է մեծանալ։
Հայկական պատվիրակությունն օրեր առաջ մեկնեց Լիբանան դաշտն ուսումնասիրելու համար, կատարեց լայնածավալ մարքեթինգային արշավ։ Հայաստանի մասին 14 հոդված տպագրվեց արաբական մամուլում, իսկ մոտ 35 միլիոնանոց լսարան ունեցող արաբական հեռուստաալիքներով ցուցադրվեց մեր զբոսաշրջային տեսահոլովակը։
