ԵՐԵՎԱՆ, 22 նոյեմբերի – Sputnik. Վանաձորի բնակիչ 33-ամյա Վոլոդյա Քոչինյանի սպանության համար մեղադրանք է առաջադրվել Վանաձորի 24-ամյա մի բնակչի։ Քննիչները պարզել են նաև դեպքի հանգամանքներն ու շարժառիթը։ Պարզվում է, որ երիտասարդի մահվան պատճառ է դարձել ավտոմեքենան կայանելու տեղի շուրջ վիճաբանությունը։
2017 թվականի նոյեմբերի 19-ին Վանաձորի Նժդեհի 9 հասցեում գտնվող շենքի բակում ավտոմեքենան կայանելու պատճառով վիճաբանություն է տեղի ունեցել 24-ամյա երիտասարդի և Քոչինյան եղբայրների միջև։ Երեք երիտասարդները պայմանավորվել են հանդիպել ու վիճաբանությունը շարունակել Վանաձորի «Քիմպրոմ» գործարանի մոտ:
Պայմանավորված վայրում արդեն վիճաբանությունը վերածվել է քաշքշոցի, որի ժամանակ 24-ամյա երիտասարդը դանակով հարվածել է Վոլոդյա Քոչինյանի որովայնին։ Ստացած մարմնական վնասվածքից վերջինը մահացել է:
24-ամյա վանաձորցուն սպանության մեղադրանք է առաջադրվել։Նախաքննությունը շարունակվում է, հայտնում է ՀՀ Քննչական կոմիտեն։
