ԵՐԵՎԱՆ, 21 նոյեմբերի — Sputnik. Ստամբուլի «Բեշիքթաշում» խաղացող Ռայան Բոթրայթն այլևս հանդես չի գա Հայաստանի հավաքականում: Armsport-ի տեղեկացմամբ այդ մասին լրագրողների հետ զրույցի ժամանակ ասել է բասկետբոլի Հայաստանի հավաքականի գլխավոր մարզիչ Նիկշա Բավցևիչը:
«Բոթրայթն իր մակարդակը ցույց է տվել ամռանն անցկացրած խաղերում, սակայն կան որոշ բաներ, որոնք կուլ տալ չենք կարող:
Բասկետբոլը թիմային մարզաձև է: Մենք փոքր բասկետբոլային երկիր ենք, բայց պետք է պաշտպանենք ազգային հավաքականի շահերը: Հավաքականում պետք է լինեն այն բասկետբոլիստները, ովքեր իսկապես ցանկանում են խաղալ Հայաստանի ընտրանու կազմում»,- ասել է խորվաթ մասնագետը:
Իր կարծիքն է հայտնել նաև ֆեդերացիայի փոխնախագահ Արա Պողոսյանը.
«Ֆեդերացիայի և մարզչի համատեղ որոշմամբ Ռայան Բոթրայթն այլևս հանդես չի գա Հայաստանի հավաքականում, նրան հեռացրել ենք: Պատճառը՝ ոչ պատշաճ վերաբերմունքն է Հայաստանի ազգային թիմի, ֆեդերացիայի ու մարզչի նկատմամբ: Դա ծանր որոշում էր, բայց ճիշտ: Ազգային հավաքականում ոչ մեկն իրավունք չունի իրեն բարձր դասել մյուսներից, բոլորը հավասար են»,- ասել է նա Արա Պողոսյանը:
Հիշեցնենք, որ Բոթրայթը միայն գիշերն էր ժամանել Հայաստան:
Հավաքականը նախապատրաստվում է Եվրոպայի առաջնության ընտրական փուլին: Թիմը նոյեմբերի 23-ին Տիրանայում ուժերը կչափի Ալբանիայի հետ, իսկ նոյեմբերի 26-ին Երևանում կհանդիպի Դանիային:
