ԵՐԵՎԱՆ, 17 նոյեմբերի – Sputnik. Ռուսաստանցի սրտի վիրաբույժ Լեո Բոկերիայի փորձի ընթացքում ամենաողբերգական դեպքը պատահել է 30 տարի առաջ։ Եթե այդ վիրահատությունն այսօր անցկացնեին, երիտասարդը ողջ կմնար, այլ չէր մահանա վիրահատական սեղանի վրա, համոզված է սրտի վիրաբույժը։
«Դա սովորական վիրահատություն էր։ Ես արեցի այն, սակայն ավարտից 20 րոպե անց, ինձ զանգահարեցին ու ասացին, որ հիվանդի ճնշումը բարձրացել է։ Նա չապրեց։ Մենք ամեն հնարավոր բան անում էինք նրան փրկելու համար, միջանցքում նրան սպասում էր մի երիտասարդ գեղեցիկ աղջիկ` հիվանդի կինը», – պատմեց Բոկերիան։
Բժիշկին ցնցել էր այդ դժբախտ կնոջ տեսքը։ Բոկերիայի համար դա ամենամեծ ողբերգությունն էր, բարեբախտաբար, այդպիսի դեպք այլևս չի կրկնվել։
Բոկերիան հաջողության գլխավոր բանալին համարում է ուսումն ու աշխատասիրությունը։
«Ես սիրում եմ ուսման սիրահարներին, քանի որ սովորաբար նրանք ոչ միայն կրթված մարդիկ են, այլ նաև վստահելի են», – ասաց Բոկերիան։
Հայտնի բժիշկը բացահայտել է իր լավ ֆիզիկական վիճակի գաղտնիքը` շատ աշխատել ու քիչ ուտել։
Բոկերիան օրը սկսում է առավոտյան 6–ին, 7:40 նա արդեն աշխատանքի վայրում է, օրեկան 4–5 վիրահատություն է անցկացնում։ Բոկերիան ճաշում է տանն աշխատանքից հետո, մոտավորապես ժամը 22:00–ին։
Ռուսաստանցի ու խորհրդային հայտնի վիրաբույժ Լեո Բոկերիան դարձավ Երևանի Մխիթար Հերացու անվան պետական բժշկական համալսարանի պատվավոր դոկտոր։ Դոկտորի կոչում նրան շնորհեց համալսարանի ռեկտոր Արմեն Մուրադյանը։
Այցի շրջանակում Բոկերիան կայցելի նաև համալսարանի կլինիկական հիվանդանոց, որտեղ նա կծանոթանա սրտաբանական բաժնի գործունեությանը։
Լեո Բոկերիան ռուսաստանցի սրտի վիրաբույժ, գյուտարար, մանկավարժ, պրոֆեսոր, Ռուսաստանի գիտությունների ազգային ակադեմիայի ակադեմիկոս է։
