ԵՐԵՎԱՆ, 16 նոյեմբերի — Sputnik. Աղջնակը փրկվել է L-410 ինքնաթիռի կործանումից ՌԴ Խաբարովսկի երկրամասում հիմնականում շնորհիվ նրա, որ կապված էր ամրագոտով։ Այդպիսի եզրահանգման է եկել երկրամասի նահանգապետ Վյաչեսլավ Շպորտը, որը եղել է դեպքի վայրում։
Չորեքշաբթի տեղական ժամանակով 13։00-ին (Մոսկվայի ժամանակով՝ 6-ին) վայրէջք կատարելիս «Խաբարովսկ-Նելկան» ուղերթ կատարող L-410 ինքնաթիռը կործանվել է։
Ինքնաթիռում երկու օդաչու է եղել և հինգ ուղևոր։ Վեցը մահացել են։ Հրաշքով փրկված Ժասմինը թռչում էր տատիկի մոտ։Նա մոր հետ չի եղել, երեխային ուղեկցում էր սոցաշխատող Օլգա Լապոնիկովան, որը նույնպես զոհվել է։
«Այն մարդը, որը հանել է երեխային պատմում էր, որ նա կիպ ամրակցված էր նստարանին, և դա որոշիչ գործոն է եղել աղջնակի ողջ մնալու համար։ Նրան ուղեկցող կինը ճիշտ էր կիրառել ամրագոտին, ինչպես պահանջում են անվտանգության կանոնները։ Հետո ամեն ինչ եղել է հանգամանքների բերումով»,- ասել է Շպորտը։
Իր հերթին, Ռոստրանսնադզորի քաղաքացիական ավիացիայի հասարակական խորհրդի ներկայացուցիչ, վաստակավոր օդաչու Օլեգ Սմիրնովը կարծում է, որ աղջիկը փրկվել է իր ճկուն ոսկորների շնորհիվ, որը բնորոշ է մանկական օրգանիզմին։
«Այն հարվածին, որը երեխան կրում է առանց հետևանքների, մեծահասակի ոսկրային համակարգը դիմանալ չի կարող»,- ՌԻԱ Նովոստիին ասել է Սմիրնովը։
ԶԼՄ-ների տարածած մեկ այլ տարբերակով՝ Ժասմինին փրկել է նստարանը, որը կոտրվել է և մասամբ ծածկել նրան։ Դրա շնորհիվ նա ծածկված է եղել։
Ժասմինին դուրս է բերել օդանավակայանի աշխատակիցը, որն առաջինն է սուրացել դեպքի վայր։ Աղջկա մոտ ախտորոշվել է գանգուղեղային տրավմա և ոտքի կոտրվածք։
Այսպես թե այնպես, Ժասմինի փրկությանը դերակատարում են ունեցել բոլոր երեք գործոնները, և այդպիսի համընկումը ոչ այլ ինչ է, քան իսկական հրաշք։
