ԵՐԵՎԱՆ, 15 հունիսի – Sputnik. Ազգային ժողովը երկրորդ ընթերցմամբ և ամբողջությամբ ընդունեց «Զինվորական ծառայության և զինծառայողի կարգավիճակի մասին» օրենքի նախագիծը:
Այդպիսով, խորհրդարանը տարկետման իրավունքից զրկեց պետպատվերով սովորող ուսանողներին: Գործող ասպիրանտների համար, որոնք արդեն ունեն տարկետում, օրենքն այն չեղյալ չի հայտարարի:
«Կողմ» է քվեարկել 86 պատգամավոր, դեմ՝ «Ելք» խմբակցության 6 անդամները: Քվեարկությունից առաջ «Ելք» խմբակցության պատգամավոր Արարատ Միրզոյանը հայտարարեց, որ 120 գիտաշխատող և դասախոս միացել են ուսանողների պահանջներին, 4 ուսանողներ շարունակում են հացադուլը: Հազարավոր ուսանողներ Երևանում շարունակում են բողոքի ակցիաները:
«Պետք է վերանայել այդ օրինագիծը և ներկայացնել նորը»,- ասաց Միրզոյանը:
«Զինվորական ծառայության և զինծառայողի կարգավիճակի մասին» օրենքում փոփոխությունների նախագծով առաջարկվում է նաև չեղյալ հայտարարել տարկետումն այն ուսանողների համար, որոնք պետպատվերով են սովորում բուհերում: Հոկտեմբերի 27-ին խորհրդարանն ընդունել է այն առաջին ընթերցմամբ:
Կառավարության կարծիքով՝ այդ քայլ ուղղված է հնարավոր կոռուպցիոն ռիսկերի վերացմանը: Բողոքող ուսանողները համոզված են, որ տարկետման վերացումը կարճաժամկետ հեռանկարում զգալի ազդեցություն չի ունենա բանակի անձնակազմի համալրման վրա, բայց հարված կհասցնի գիտակրթական պոտենցիալին:
