ԵՐԵՎԱՆ, 14 նոյեմբերի–Sputnik. Տարկետման իրավունքի դեմ պայքարող ուսանողներից Դավիթ Պետրոսյանն իր ֆեյսբուքյան էջում ուղիղ եթեր մտավ ու տեղեկացրեց, որ հացադուլ են սկսել։ ԵՊՀ կիրառական մաթեմատիկայի ֆակուլտետի շենքի լսարաններից մեկում Դավթի հետ է ևս 4 ուսանող։
Պարզվում է, որ հիմնական պահանջներից զատ` նրանք բողոքում են նաև հասարակական անտարբերության դեմ։
Շենքի առջևում էլ նստացույց են կազմակերպել բողոքին միացած մյուս ուսանողները։ Նրանցից մեկը` Վահան Կոստանյանը, Sputnik Արմենիայի հետ զրույցում ասաց` հացադուլն ու նստացույցն անժամկետ են։
«Ստեղծված անտարբերության մթնոլորտը մեր 5 ընկերներին ստիպեց հացադուլ հայտարարել։ Այս պահին ժամկետների հետ կապված ոչինչ չկա, անժամկետ է»,–ասաց նա։
Նրա խոսքով` հացադուլը կձգվի այնքան ժամանակ, քանի դեռ 700–1000 մարդ չի հավաքվել։ Միայն այդ թվի դեպքում հացադուլավորներին կհամոզեն դադարեցնել այն։ Իրենք էլ այնտեղ նստել են, որ ապահովեն 5 հոգու անվտանգությունը։
«Հավանական եմ համարում, որ նրանց կհանեն այնտեղից, մենք պետք է ապահովենք նրանց անվտանգությունը»,–ասաց նա։
Այն հարցին, որ շատերը կարծում են` իրենց բողոքը ծառայությունից խուսափելու համար է, Կոստանյանը միայն նշեց` իրենց շարքերում նաև աղջիկներ են ու ծառայած տղաներ։
ԵՊՀ կիրառական մաթեմատիկայի ֆակուլտետի շենքի բակում բարձրագոչ կոչերին ժամանակ առ ժամանակ հետևում են երաժշտական կատարումներ։
