ԵՐԵՎԱՆ, 9 նոյեմբերի — Sputnik. Արդեն 3–րդ օրը բանակից տարկետման վերացման դեմ բողոքող ուսանողները բողոքի քայլերթով հասան կառավարության շենքի մոտ։
Նրանք ցանկանում են հանդիպել Կարեն Կարապետյանի հետ։
Հանուն գիտության զարգացման նախաձեռնության անդամ Դավիթ Պետրոսյանը բարձրախոսով դիմեց վարչապետին.
«Եկել ենք այստեղ հայտնելու մեր մտահոգությունը տարկետման իրավունքի սահմանափակման հետ կապված: Ցավոք, մինչև հիմա ձեզանից դեռ կարծիք չենք լսել, կցանկանանք լսել ձեր կարծիքը օրինագծի մասին և կմնանք այնքան ժամանակ մինչև կստանանք որևէ պատասխան»,-ասաց նա:
Հիշեցնենք, որ Երևանի պետական համալսարանի ուսանողներն արդեն երրորդ օրն է՝ բողոքում են տարկետման իրավունքի վերացման դեմ։
Այսօր նրանք կրկին չեն մասնակցել դասերին, շրջել են ԵՊՀ ֆակուլտետներում, որից հետո քայլերթով եկել են կառավարության շենքի մոտ։ Նրանց են միացել նաև այլ բուհերի ուսանողներ։
ՀՀ կառավարության ներկայացրած «Զինվորական ծառայության և զինծառայողի կարգավիճակի մասին օրենքի» նախագծով նախատեսվում է վերացնել ՀՀ պետական բուհերի պետպատվեր համակարգում սովորող ուսանողների համար գործող օրենքով նախատեսված տարկետման իրավունքը։ Կառավարության հիմնավորմամբ` այդ քայլը միտված է վերացնելու հնարավոր կոռուպցիոն ռիսկերը։ Օրենքն առաջին (ոչ վերջնական) ընթերցմամբ ընդունել է խորհրդարանը հոկտեմբերի 27-ին։
