ԵՐԵՎԱՆ, 11 նոյեմբերի — Sputnik. Ռուսաստանի եւ ԱՄՆ-ի նախագահներ Վլադիմիր Պուտինը եւ Դոնալդ Թրամփը հանդես են եկել համատեղ հայտարարությամբ, որում ասում են, որ Սիրիայում հրադադարի պահպանման հսկողությունը կշարունակի անցկացնել Amman մոնիտորինգի կենտրոնը՝ Հորդանանի, Ռուսաստանի Դաշնության եւ Միացյալ Նահանգների փորձագետների մասնակցությամբ։
«Այսօր նախագահները նաեւ ողջունել են սկզբունքների մասին հուշագրի կնքումը Ամմանում նոյեմբերի 8-ին՝ Հորդանանի Հաշիմյան Թագավորությունում, Ռուսաստանի Դաշնության և Միացյալ Նահանգների միջև»,- ասված է հայտարարության մեջ:
Այդ հուշագիրն ամրապնդում է կրակի դադարեցման, հրադադարի պահպանման, օտար զորքերի կրճատման և օտարերկրյա գրոհայիններին տարածքից հեռացնելու, ինչպես նաև տևական խաղաղություն ապահովելու նախաձեռնությունը:
Երկու երկրների ղեկավարները կոչ են արել ՄԱԿ-ի երկրներին մեծացնել իրենց ներդրումն առաջիկա ամիսներին Սիրիային օգնելու համար:
«Նախագահները քննարկել են Սիրիայում մարդկային տառապանքի նվազեցման անհրաժեշտության հարցը և կոչ արել ՄԱԿ-ի բոլոր անդամներին առաջիկա ամիսներին ավելացնել իրենց ավանդը մարդասիրական օգնության համար»,- նշվում է փաստաթղթում:
