ԵՐԵՎԱՆ, 10 նոյեմբերի — Sputnik. Ղարաբաղա-ադրբեջանական շփման գծում միջադեպերի հետաքննության համար պետք է հավելյալ միջոցներ ձեռնարկել։ Այս մասին հայտարարել է ԵԱՀԿ-ում ՌԴ մշտական ներկայացուցիչ Ալեքսանդր Լուկաշևիչը՝ ելույթ ունենալով ԵԱՀԿ Մշտական խորհրդի նիստում։
Նրա խոսքով՝ Ժնևում Հայաստանի և Ադրբեջանի նախագահների՝ երկարատև դադարից հետո կայացած հանդիպումը ԵԱՀԿ ՄԽ համանախագահների՝ Բաքվում, Երևանում և Լեռնային Ղարաբաղում ակտիվ շփումների միջոցով գործադրված միջնորդական ջանքերի նկատելի արդյունքն է։
«Հուսանք, որ Ժնևում Հայաստանի և Ադրբեջանի նախագահների հանդիպման արդյունքում գրանցված կառուցողական մթնոլորտը բանակցություններում կպահպանվի։ Ակնկալում ենք՝ մինչև տարեվերջ պլանավորված՝ Հայաստանի և Ադրբեջանի ԱԳ նախարարների հետ համանախագահների հանդիպումն արդյունավետ կլինի»,- ասել է դիվանագետը։
Նրա խոսքով՝ ԵԱՀԿ Մինսկի խմբի համանախագահների միջնորդական առաքելության արդյունավետության անհրաժեշտ պայմաններից է տարածաշրջանում խաղաղությանն ու կայունությանն աջակցելը:
«Հույս ունենք, որ հնարավորինս արագ կհամաձայնեցվի ԵԱՀԿ գործող նախագահի անձնական ներկայացուցչի գրասենյակի ընդլայնման ալգորիթմը՝ այն սխեմայի հիման վրա, որը թույլ կտա որակապես ավելացնել տարածաշրջանում իրավիճակի դիտարկման հնարավորությունները: Շփման գծում և ադրբեջանա-հայկական սահմանին կայունության շահերին կհամապատասխաներ նաև հակամարտության գոտում զինված միջադեպերի հետաքննության համատեղ մեխանիզմի մշակումն ավարտելը: Այս սկզբունքային համաձայնությունների կյանքի կոչումը թույլ կտար ամրապնդել կողմերի երկխոսության դրական մթնոլորտը և լրացուցիչ կխթաներ բանակցային գործընթացը»,- ասել է Լուկաշևիչը:
ՀՀ և Ադրբեջանի նախագահների ԼՂ խնդրի կարգավորման շուրջ հանդիպումն ու բանակցությունները տեղի են ունեցել Ժնևի ՄԱԿ-ի գրասենյակում և այլ միջազգային կազմակերպություններում Շվեյցարիայի մշտական ներկայացուցչի կեցավայրում։
Հանդիպմանը ներկա են եղել նաև երկու երկրների արտաքին գործերի նախարարներ Էդվարդ Նալբանդյանն ու Էլմար Մամեդյարովը, ԵԱՀԿ ՄԽ համանախագահներ Իգոր Պոպովը, Էնդրյու Շեֆերը, Ստեֆան Վիսկոնտին և ԵԱՀԿ գործող նախագահի անձնական ներկայացուցիչ Անջեյ Կասպրշիկը։
Հանդիպման ավարտին տեղի է ունեցել նաև Սերժ Սարգսյանի և Իլհամ Ալիևի առանձնազրույցը:
