ԵՐԵՎԱՆ, 10 նոյեմբերի- Sputnik. ԱԺ-ում «Զինվորական ծառայության և զինծառայողի կարգավիճակի մասին» օրենքի նախագծի քննարկման հետաձգումից հետո փոխնախարար Արտակ Զաքարյանն ասաց, որ պաշտպանության նախարարությունը զինծառայությունից խուսափելուն վերաբերող օրինագծի վերաբերյալ կատարել է զիջումներ:
«Սկզբունքային չէր մեր դիրքորոշումը և երբեք սկզբունքային չի եղել: Մամուլն էր այդպես ներկայացրել, որ ՊՆ-ն սկզբունքային դիրքորոշում է հայտնել: Գտնում ենք, որ պետք է բարձրացնել գոյություն ունեցող չնչին տուգանքի չափը, որը իրականում խոչընդոտ չէր հանդիսանում բանակից խուսափումների համար։ Մյուս նիստում կքննարկվի, օրինագծի հեղինակները մեր պատգամավորներն են, մենք հարակից զեկուցողներ են։ Նիստին ամեն ինչ պարզ կլինի»,- ասաց Արտակ Զաքարյանը։
Նշենք, որ այսօր Պաշտպանության և ազգային անվտանգության հարցերի հանձնաժողովի նիստում պետք է քննարկվեր «Սահմանված կարգի խախտմամբ պարտադիր զինվորական ծառայություն չանցած քաղաքացիների մասին» օրենքում փոփոխություններ կատարելու նախագիծը: Նախագիծը հեղինակել են մի խումբ պատգամավորներ՝ Գալուստ Սահակյանը, Կարինե Աճեմյանը, Վահե Էնֆիաջյանը, Աղվան Վարդանյանն ու Արտակ Զեյնալյանը: Նրանք առաջարկում են պարտադիր զինծառայություն չանցած, արտերկրում գտնվող, 27 տարեկանը լրացած երիտասարդներին այս անգամ էլ հնարավորություն տալ վճարում կատարել և ազատվել հետախուզումից:
