ԵՐԵՎԱՆ, 9 նոյեմբերի — Sputnik. Ադրիատիկ ծովին նայող Ջուստինելի փողոցում գտնվող Մադոննա–դելե–Գրացիե եկեղեցին գտնվում է Իտալիայի մշակույթի նախարարության պահպանության ներքո։
Իշխանությունները հանձնել են այն Մխիթարյան միաբանության խնամատարությանը, սակայն նրանք արդեն 8 տարի է, ինչ այստեղ չեն այցելել, գրում է Il Picollo–ն։
Այգու և շենքի մասին փորձում է գոնե մի փոքր հոգ տանել (որքան կարող է հոգ տանել կինը) իտալուհի Ջաննա Տալյապետրան, որը երկար ժամանակ է, ինչ ապրում է այստեղ։
Ծառայողական շինություններ ունեցող եկեղեցին 1850 թվականին կառուցել է բարերար Գրեգորիո Անանյանը։ Այստեղ պահպանվել է այն երգեհոնը, որը Մխիթարյաններին էր նվիրել ավստրո-հունգարացի բանաստեղծ, երաժիշտ և լեռնագնաց Յուլիուս Կուգին:
1930-ականներին այստեղ պատարագ էին մատուցում գերմանացի կաթոլիկները։ Պատերազմի տարիներին վանահայր Յոհաննես Դիթրիխը նկուղում հրեաների էր թաքցնում:
Երգեհոնը մի փոքր ավելի լավ է պահպանվել, իսկ որմնանկարներն առաստաղի վրա արդեն խոնավություն են ներծծել։ Տանիքի կեսը փլվել է։ Զանգակատունը մի կերպ «պահում» են պաշտպանիչ շինարարական աստիճանները։
Վերջին անգամ այստեղ պատարագ է անցկացվել 2009 թվականին, վերջին համերգը` 2010 թվականին։ Այնուհետև լռություն է տիրում։
Համալիրը վերականգնելու համար շուրջ 30 հազար եվրո է պահանջվում, սակայն գումար գտնել չի հաջողվում։
«Մխիթարյանները դեռ չեն հայտնվում։ Մնում է հուսալ, որ իրենց նոր հոգևոր առաջնորդը՝ Կոստանդնուպոլսի եպիսկոպոսը, ինչ–որ բան դեպի լավը կփոխի»,– գրում է պարբերականը։
Տեղացիները ուզում են վերականգնել եկեղեցին գերմանական համայնքի համար։
