ԵՐԵՎԱՆ, 9 նոյեմբերի–Sputnik. Վարչապետ Կարեն Կարապետյանն ընդունել է բողոքի ցույց անցկացնող ուսանողների ներկայացուցիչներին։ Այս մասին իր ֆեյսբուքյան էջում հայտնում է վարչապետի մամուլի քարտուղար Արամ Արարատյանը։
Հանդիպմանը մասնակցել են նաև պաշտպանության և կրթության ու գիտության նախարարները։
Արդեն 3–րդ օրը բանակից տարկետման վերացման դեմ բողոքող ուսանողները բողոքի քայլերթով հասել էին կառավարության շենքի մոտ։
Նրանք ցանկանում էին հանդիպել Կարեն Կարապետյանի հետ։ Վերջինն էլ խոստացել էր` հանդիպումը կկայանա, սակայն առանց լրատվամիջոցների ներկայացուցիչների։
ՀՀ կառավարության ներկայացրած «Զինվորական ծառայության և զինծառայողի կարգավիճակի մասին օրենքի» նախագծով նախատեսվում է վերացնել ՀՀ պետական բուհերի պետպատվեր համակարգում սովորող ուսանողների համար գործող օրենքով նախատեսված տարկետման իրավունքը։ Կառավարության հիմնավորմամբ` այդ քայլը միտված է վերացնելու հնարավոր կոռուպցիոն ռիսկերը։ Օրենքն առաջին (ոչ վերջնական) ընթերցմամբ ընդունել է խորհրդարանը հոկտեմբերի 27-ին։
