ԵՐԵՎԱՆ, 7 նոյեմբերի — Sputnik. Ռուսական Առաջին ալիքի «Իրականում» (На самом деле) հաղորդաշարի հյուրերն էին ԽՍՀՄ ժողովրդական արտիստ Արմեն Ջիգարխանյանի և նրա երիտասարդ կնոջ՝ Վիտալիա Ռամանովսկայայի ներկայացուցիչները: Այս հաղորդման շրջանակում դժվար է ստել է, որովհետև ստի դետեկտորն ու համապատասխան փորձագետները արագ տարբերում են սուտը ճշտից:
Փորձագետների հարցերին Վիտալինայի ներկայացուցիչ Էլինա Մազուրը տալիս էր ոչ հստակ պատասխաններ, ինչը ստիպում էր նրանց կրկնել կամ ավելի կոնկրետացնել հարցը: Հաղորդման ընթացքում պարզ դարձավ, որ Էլինա Լազուրը Վիտալինայի հետ ծանոթացել է ընդամենը մեկ ամիս առաջ՝ հոկտեմբերի 2-ին: Ավելին՝ պարզվեց, որ նոտարով Վիտալինայից վստահված անձի հավաստագիր ստացած Էլինա Լազուրը չունի իրավաբանի կրթություն և որակավորում, ինչը նման գործունեության համար կարևոր պայման է: Նա տնտեսագետ է: Փորձագետի հարցին, թե նա նախկինում փաստաթղթային և այլ կեղծարարությամբ զբաղվող խմբավորումների հատ կապ ունեցել է, թե ոչ, Էլինան պատասխանեց` ոչ: Էլինայի բացասական պատասխանը հերքեց ստի դետեկտորը: Սարքը նաև բացահայտեց՝ Էլինա Լազուրն ու Վիտալինա Ցիմբալյուկ- Ռոմանովսկայան զբաղվել են փաստաթղթերի կեղծմամբ:
Ստի դետեկտորը պարզեց նաև, որ Էլինա Լազուրը, բացի Վիտալինայից ստացած աշխատավարձից, նրա հետ շփման մեջ այլ շահադիտական հետաքրքրություններ է ունեցել:
Միայն Արմեն Բորիսովիչի պարտադիր ինսուլին ստանալու վերաբերյալ հարցին Լազուրի պատասխանները ստի դետեկտորն ու փորձագետները ճիշտ որակեցին:
Լազուրը վրդովվեց և հայտարարեց, որ հաղորդումը մանկապարտեզ է հիշեցնում: Նա պնդեց, որ Մոսկվայի բնակարանները Վիտալինան գնել է հոր փողերով, որն Ուկրաինայում ձեռնարկատեր է եղել, իսկ 2008-ին վաճառել էր իր բիզնեսն ու գումարը տեղափոխել ՌԴ: Չգիտես ինչու, նախկին ձեռնարկատերը սովորական ինժեներ է դարձել Ջիգարխանյանի ղեկավարած թատրոնում:
Արմեն Ջիգարխանյանի ներկայացուցիչ Մարկ Ռուդիշտեյնն ավելի հանգիստ էր: Նա պնդում էր, որ Արմենի և Վիտալինայի հարաբերությունները սրվել են այն ժամանակ, երբ Վիտալինայի կյանքում հայտնվել է Էլինա Լազուրը: Ռուդիշտեյնը պնդում էր, որ Վիտալինան Էլինայի հետ միասին ամեն բան արել են, որպեսզի տիրանան ոչ միայն Ջիգարխանյանի, այլ նաև թատրոնի փողերին:
Հաղորդման վերջում տաղավարում հայտնվեց Արմեն Ջիգարխանյանի թատրոնի նախկին աշխատակցուհին՝ Նատալյա Դիակյոնովան, ում Վիտալինա Ցիմբալյուկ- Ռոմանովսկայան ազատել էր աշխատանքից ֆիզարձակուրդում լինելու ընթացքում, և իր քայլը չէր հիմնավորել որևէ պատճառաբանությամբ:
«Թատրոնում տարբեր բաներ էին խոսում, և երևում էր, որ նրանց հարաբերությունները լարված են: Վիտալինա Ցիմբալյուկ- Ռոմանովսկայան շատ ավելի վաղուցվանից էր ղեկավարում թատրոնը, քան պաշտոնապես տնօրեն նշանակվելը: Նրա գալուց հետո թատրոնում մթնոլորտը դեպի վատը փոխվեց, նրա պատճառով շատ մարդիկ կրճատվեցին, նաև ես, երբ ֆիզարձակուրդում էի: Վիտալինան միշտ Ջիգարխանյանի կողքին էր և, ամենայն հավանականությամբ, փողերից ու հաշվապահությունից լավ տեղյակ էր: Նրա պատճառով արտիստները սկսեցին հեռանալ թատրոնից: Կարծում եմ՝ Արմեն Բորիսևիչը որպես տղամարդ չէր հետաքրքրում նրան: Նրա համար կարևոր էր միայն թատերական աշխարհում առաջ գնալն ու ամուսնու ունեցվածքը»,-պատմեց թատրոնի նախկին աշխատակցուհին:
Իսկ իրականում՝ եղել է արդյո՞ք սպանության փորձ Արմեն Ջիգարխանյանի նկատմամբ սեփական կնոջ կողմից, թե՞ ոչ, արդյո՞ք Վիտալինան գողացել է նրա ունեցվածքը. այս կարևոր հարցերի պատասխանը՝ ստի դետեկտորի ու փորձագետների օգնությամբ, կիմանանք «Նա սամոմ դելե» հաղորդման մյուս թողարկման ընթացքում:
