ԵՐԵՎԱՆ, 7 նոյեմբերի — Sputnik. Դերասանուհի Օլգա Կաբոն աջակցություն է հայտնել ԽՍՀՄ ժողովրդական արտիստ Արմեն Ջիգարխանյանի կնոջը և քաջալերիչ մեկնաբանություն գրել Վիտալինա Ցիմբալյուկ-Ռոմանովսկայայի ` Instagram-ի էջում հրապարակված գրառումներից մեկի տակ։ Այս մասին գրում է Cosmopolitan պարբերականի առցանց տարբերակը։
Ըստ պարբերականի` Վիտալինան ամուսնությունը պահպանելու հույսը դեռ չի կորցնում` չնայած ընտանիքում ծագած խժդժություններին, գողության ու մահափորձի մեղադրանքներին։
«Հիշու՞մ ես Ֆաինա Ռանևսկայային. «Ես ձեզ ինչպե՞ս հասնեմ։ Ստիպված պիտի շատ իջնեմ»… Դիմացիր… սիրելիս և ուժեղս»,- գրել է Օլգա Կաբոն։
Վիտալինան շնորհակալություն է հայտնել նրան։
Պարբերականը գրում է նաև, որ Ջիգարխանյանի շրջապատում շատերը վստահ են, որ 38-ամյա Վիտալինան փախել է, որովհետև նրա դեմ պատրաստվում են քրեական գործ հարուցել։ Արմեն Բորիսովիչը դիմել է ոստիկանություն` վստահեցնելով, որ կինն իր անունով է դարձրել ամբողջ գույքը և գումարային խարդախություններ է արել իր ղեկավարած թատրոնում։
Ցիմբալյուկն իր հերթին կարծում է, որ ընտանեկան սկանդալը ծագել է ռեժիսոր Յուրի Կլեպիկովի պատճառով, որն այժմ թատրոնում ստանձնել է Արմեն Բորիսովիչի պարտականությունները։ Վիտալինան կասկածով է խոսել նրա մասնագիտական կարողությունների մասին և կշտամբել Ջիգարխանյանի հետ լավ հարաբերություններ ունենալու համար։
Պարբերականի տվյալով, Ռոմանովսկայայի ներկայացուցիչը պնդում է, որ Արմեն Ջիգարխանյանը որևէ կապ չունի կնոջ գնած բնակարանների հետ և դրանց հանդեպ հավակնություններ ունենալ չի կարող։
Հետաքրքիր է, որ Վիտալինայի ներկայացուցիչը հայտնել է, թե որքան աշխատավարձ է ստանում հայտնի դերասանը։ Նրա խոսքով, ժողովրդական արտիստն ամսական ընդամենը 100 հազար ռուբլի աշխատավարձ է ստանում, որի մեծ մասը ծախսվում է դեղորայքի համար։
«Այնպես որ նա չէր կարող գումար կուտակել բնակարան գնելու համար»,- ասել է նա։
Հիշեցնենք, որ կնոջ հետ բախումից հետո Արմեն Ջիգարխանյանը հոկտեմբերի 10-ին հայտնվել էր Մոսկվայի 57-րդ քաղաքային հիվանդանոցում, որտեղ մնացել էր 10 օր։ Հիվանդանոցում նա ասել էր, որ չգիտի` հետո ուր պետք է գնա, քանի որ ամբողջ գույքը կնոջ անունով է վերաձևակերպվել։
