ԵՐԵՎԱՆ, 7 նոյեմբերի — Sputnik. «Հանուն գիտության զարգացման» խումբն անտեսել է ՀՀ պաշտպանության նախարար Վիգեն Սարգսյանի հետ հանդիպելու հրավերը։ Այս մասին հայտնում է ՀՀ ՊՆ մամուլի քարտուղար Արծրուն Հովհաննիսյանը։
«Ցավալի է, բայց այսօր «Հանուն գիտության զարգացման» խումբն անտեսեց մեր հրավերը: Կրկնակի անհասկանալի է, որ նրանք պահանջում էին ՀՀ ՊՆ Վիգեն Սարգսյանի հետ հանդիպում, սակայն հանդիպման հրավերից հրաժարվեցին»,- Facebook սոցիալական ցանցում գրել է Հովհաննիսյանը:
Նրա խոսքով` չնայած այն հանգամանքին, որ այլ բուհերի ուսխորհուրդներից հրավիրվել էին երկու ներկայացուցիչ, իսկ «Հանուն գիտության զարգացման» խմբից համաձայնել էին ընդունել չորս ներկայացուցչի, նրանք միևնույնն է` երկար մտածելուց հետո հրաժարվել են:
Այսօր ԵՊՀ ուսանողները հերթական անգամ դասադուլ էին կազմակերպել և բողոքել «Զինվորական ծառայության և զինծառայողի կարգավիճակի մասին օրենքի» նախագծի դեմ։
Նշենք, որ թեև նախաձեռնության անդամները չեն գնացել հանդիպման, ՊՆ նախարար Վիգեն Սարգսյանի մոտ քննարկումն, այնուամենայնիվ, կայացել է:
Պաշտպանության նախարարը նկատել է, որ ուսանողների այն մտահոգությունները, թե իբր նոր օրենքներով տարկետում հասկացությունը վերանալու է, բնավ իրականությանը չի համապատասխանում։ Ուսումնական տարկետումը չի վերացվում, այլ կրթություն ստանալ ցանկացող, դրա անընդհատությունը կարևորող քաղաքացիներին, ովքեր ուսումն ավարտելուց հետո պետք է բակալավրի աստիճանով զորակոչվեն բանակ, առաջարկվում է բանակ զորակոչվել որպես սպա, դրա դիմաց ստանալ աշխատավարձ, ուսման ծախսերի փոխհատուցում բակալավրիատում, իսկ հետո` նաև մագիստրատուրայում։լուրջ է:
Հիշեցնենք` ՀՀ կառավարության ներկայացրած «Զինվորական ծառայության և զինծառայողի կարգավիճակի մասին օրենքի» նախագծով նախատեսվում է վերացնել ՀՀ պետական բուհերի պետպատվեր համակարգում սովորող ուսանողների համար գործող օրենքով նախատեսված տարկետման իրավունքը։ Կառավարության հիմնավորմամբ` այս քայլը միտված է վերացնելու հնարավոր կոռուպցիոն ռիսկերը։
Օրինագիծն ԱԺ-ում ընդունվել է առաջին ընթերցմամբ։
