ԵՐԵՎԱՆ, 7 նոյեմբերի – Sputnik. «Զինվորական ծառայության և զինծառայողի կարգավիճակի մասին օրենքի» նախագիծը Երևանի պետական համալսարանի ուսանողներին չի գոհացնում։ Նրանք հերթական անգամ դասադուլ են կազմակերպել ու որոշել են գնալ մինչև վերջ։ Համալսարանի ուսանողներից մեկը` Դավիթը, Sputnik Արմենիայի հետ զրույցում հայտնեց, որ իրենք քննարկման են հրավիրել ՀՀ կրթության և գիտության ու պաշտպանության նախարարներին։
«Մենք ցանկանում ենք, որ տարկետման ինստիտուտը պահպանվի։ Ամեն օր պատրաստվում ենք դասադուլ անել, մինչև մեր բարձրացրած հարցերը տեղ հասնեն»,– ասաց Դավիթը։
Ուսանողը նշեց, որ այս պահին համալսարանի շենքի մոտ հավաքվել են ավելի քան 300 ուսանող։ Հաստատության դռները փակել են, ու ելումուտն արգելված է։ Ուսանողներն առաջարկել են իրենց միանալ նաև դասախոսներին։ Նրանց մի մասը, ինչպես Դավիթն է տեղեկացնում, միացել են իրենց բողոքին, սակայն պահպանում են չեզոքությունը` ելնելով աշխատանքի անհրաժեշտությունից։
Հիշեցնենք` ՀՀ կառավարության ներկայացրած «Զինվորական ծառայության և զինծառայողի կարգավիճակի մասին օրենքի» նախագծով նախատեսվում է վերացնել ՀՀ պետական բուհերի պետպատվեր համակարգում սովորող ուսանողների համար գործող օրենքով նախատեսված տարկետման իրավունքը։ Կառավարության հիմնավորմամբ` այս քայլը միտված է վերացնելու հնարավոր կոռուպցիոն ռիսկերը։
Օրինագիծն ԱԺ–ում ընդունվել է առաջին ընթերցմամբ։
