ԵՐԵՎԱՆ, 7 նոյեմբերի – Sputnik, Լաուրա Սարգսյան. Սամցխե-Ջավախեթի շրջանի հայաբնակ Դադեշ գյուղի բնակիչները բողոքի ակցիա են անցկացրել Կարծախի-Ախալքալաք երթուղում: Պատճառը նոյեմբերի 6-ի գիշերը տեղի ունեցած գողությունն էր, Sputnik Արմենիային հայտնեց Ջավախքի Jnews.ge տեղեկատվական կենտրոնի խմբագիր Ռիմա Ղարիբյանը:
«Նոյեմբերի 6-ի գիշերը Դադեշ գյուղում երկու գոմ են թալանել: Առևանգել են 21 կով, ձի, շուն, ինչպես նաև տեխնիկա»,- ասել է Ղարիբյանը Sputnik- ի թղթակցի հետ զրույցում:
Ըստ նրա՝ գյուղացիները դեռ չեն հասկանում, թե ինչպես են գողերը կարողացել անաղմուկ տանել այդքան շատ կենդանիների: Մարդիկ վախենում են, առաջ նրանք չեն փակում դռները, բայց այսօր պետք է ստուգեն մի քանի անգամ, թե արդյո՞ք դարպասները փակ են:
«Բնակիչները պահանջում են գտնել կովերին, քանի որ շատերի համար դա եկամտի միակ աղբյուրն է, նրանք ցանկանում են, որ ավազակները պատժվեն: Նման հանցագործություն տեղի է ունեցել մեկուկես տարի առաջ հարևան Կարծախի գյուղում»,- ասաց Ղարիբյանը:
Նրա խոսքով՝ երեկ գյուղացիներն արգելափակել էին Կարցախի-Ախալքալաքի երթուղին, պահանջելով համապատասխան կառույցներից գտնել և վերադարձնել կովերը և գույքը: Այդուամենայնիվ, դա չի խանգարել Թուրքիայից բեռնատար մեքենաների անցնելուն (գյուղը սահմանակից է Թուրքիայի հետ, խմբ.):
Ղարիբյանը պատմեց, որ գյուղացիներն իրենց փոքրիկ հետաքննություն են անցկացրել, որի արդյունքում հայտնաբերվել է, որ կողոպուտի հետքերը տանում են Թուրքիա: Չեզոք գոտում նրանք գտել էին կով և հորթ։
Դադեշցիները ճանապարհի արգելափակումը դադարեցրին այն պայմանով, որ այսօր Ախալքալաքում կհանդիպեն Վրաստանի Ներքին գործերի նախարարության ներկայացուցիչների հետ:
