ԵՐԵՎԱՆ, 6 նոյեմբերի – Sputnik. 2018 թվականի ֆուտբոլի աշխարհի առաջնության տարբեր երկրներից ժամանած երկրպագուներին Դոնի Ռոստովում կհյուրասիրեն տարբեր ուտեստներ, այդ թվում` հայկական խորոված, հայտնում է «Ռոսիյսկայա գազետա» պարբերականը։
«Չալթր գյուղը Ռուսաստանի հարավի գաստրոնոմիական ու խորովածային մայրաքաղաքն է։ Այստեղ հասարակական սննդի 130 կետ կա, որոնք միաժամանակ կարող են ավելի քան 10 հազար մարդ ընդունել։ Ընդ որում` հայկական գյուղի ընդհանուր բնակչությունը 16 հազար մարդ է», – գրում է պարբերականը։
Գյուղի հաստատություններից մեկում աշխատող շեֆ–խոհարար Սերգեյ Խրխրյանը Ռուսաստանի լավագույն խոհարարն է։ Նա հաղթել է WorldSkills Russia-2016 առաջնությունում, ու ոսկե մեդալ է ստացել «Խոհարարական արվեստ» անվանակարգում։
«Մեր նախնիները շատ են ճանապարհորդել ու ձգտել են սովորել պատրաստել տարբեր երկրների ամենահամեղ ու ամենահետաքրքիր ուտեստները։ Նրանք փոխանցել են մեզ իրենց խոհարարական արվեստի գաղտնիքները», – թերթի հետ հարցազրույցում ասել է Խրխրյանը։
Սերգեյը մանկուց սկսել է պատրաստել։ Խոհարարական արվեստի նրբությունները նա սովորել է իր տատիկներից. իմացել է` ինչպես պատրաստել կարկանդակներ ու տորթեր, նաև պելմեներ սարքել։ 15 տարեկանում նա տեղի ռեստորանում գործի է անցել` հայտնի խոհարար ու խորովածագործ Սերգեյ Նասխուլիյանի մոտ։
Դոնի Ռոստովի զբոսաշրջիկների համար ստեղծվել է հյուրընկալության հատուկ կենտրոն, որտեղ տարբեր երկրներից ժամանած երկրպագուները կարող են Չալթր գյուղի բնակիչների պատրաստած հայկական ուտեսները համտեսել։ Ռուսաստանի այլ քաղաքներն էլ են պատրաստվում հյուրեր դիմավորել։
Ֆուտբոլի աշխարհի առաջնությունը կկայանա Ռուսաստանում 2018 թվականի հունիսի 14–ից հուլիսի 15–ը։